Lionel Messi yasabye imbabazi ikipe ya PSG na bagenzi be bakinana muri iyi kipe yo mu Bufaransa, nyuma yo kujya muri Arabie Saoudite nta ruhushya yabiherewe n’ikipe bigatuma asiba imyitozo yo ku wa Mbere w’iki cyumweru.
Messi yasabye imbabazi binyuze mu mashusho yashyize ku rubuga rwe rwa Instagram.
Ati: “Nifuje gukora iyi videwo nyuma y’ibyabaye byose. Mbere na mbere nagira ngo nsabe imbabazi bagenzi banjye ndetse n’ikipe.”
Uyu munya-Argentine yakomeje agira ati: “Mu by’ukuri nari natekereje ko dufite ikiruhuko nyuma y’umukino [wahuje PSG na Lorient] nk’uko byari byarangenze mu byumweru byari byabanje. Nakabaye narasubitse uru rugendo nk’uko nari nararusubitse hambere. Nsubiyemo, ndasaba imbabazi ku byo nakoze kandi ntegereje icyemezo ikipe izafata.”
PSG iheruka guhagarika Messi ibyumweru bibiri adakora imyitozo ndetse atanahembwa ku bw’ariya makosa.
