Rayon Sports yasezerewe mu mikino ya CAF Confederation Cup y’uyu mwaka, nyuma yo gusezererwa na Al Hilal Benghazi yo muri Libya kuri penaliti 4-2.
Iyi kipe ikunzwe kurusha izindi yari yakiriye Al Hilal kuri Kigali Pele Stadium, mu mukino wo kwishyura warangiye amakipe yombi aguye miswi igitego 1-1.
Ni nyuma y’ubanza nanone amakipe yombi yari yanganyijemo igitego 1-1 mu cyumweru gishize.
Rayon Sports yasabwaga byibura kunganya 0-0 igasubiramo amatsinda yo gukina amatsinda ya CAF Confederation Cup iheruka gukora muri 2018.
Icyizere cy’iyi kipe cyatangiye kuyoyoka ku munota wa mbere w’umukino, kuko Al Hilal yawinjiyemo ihita itsinda igitego cyatsinzwe na Ezzedin Elmarmi.
Ni igitego uyu musore wanatsinze icyo ikipe ye yatsinze mu mukino ubanza, nyuma y’amakosa y’abarimo Rwatubyaye Abdoul wananiwe gukiza izamu rye.
Byabaye ngombwa ko Rayon Sports itangira gukinira ku gitutu, ishaka igitego cyo kwishyura.
Igice cya mbere cy’umukino cyaranzwe no kurya iminota ku ruhande rwa Al Hilal Benghazi cyarangiye amakipe yombi anganya igitego 1-1.
Byasabye umunota wa 38 ngo Murera igombore, ku mupira HĂ©ritier Luvumbu yateretse ku mutwe wa Joackiam Ojera mbere y’uko uyu munya-Uganda awutereka mu izamu.
Igice cya kabiri cy’umukino cyaranzwe no kugerageza uburyo bwinshi ku ruhande rwa Rayon Sports, gusa abarimo Luvumbu, Ojera, Mugadam na Charles Bbale winjiye mu kibuga asimbura ntibabyaza umusaruro uburyo bagiye babona.
Al Hilal Benghazi yashoboraga gutsinda igitego cya kabiri ku munota wa 73 w’umukino, ubwo myugariro Serumogo Ally Omar yashakaga guha umupira n’umutwe Hakizimana Adolphe wasaga n’uwarangaye, gusa ku bw’amahirwe umupira uca hanze gato y’izamu.
Nyuma y’uko iminota isanzwe y’umukino irangiye amakipe yombi anganya igiteranyo cy’ibitego 2-2, byabaye ngombwa ko hiyambazwa za Penaliti.
Rayon Sports yahushije penaliti ebyiri zayo za mbere zirimo iya Kalisa Rashid yakuwemo n’umunyezamu, mu gihe iya Mugisha Franà §ois yagonze umutambiko w’izamu.
Myugariro Nsabimana Aimable na Charles Baale binjije Penaliti zitigeze zigira icyo zimara, kuko Al Hilal Benghazi yinjije Penaliti enye zose abakinnyi bayo bateye.
