Imirwano hagati y’Ingabo za Repubulika Iharanira Demokarasi ya Congo n’inyeshyamba za M23, yakomeje kuri uyu wa Gatandatu muri Teritwari ya Nyiragongo.
Impande zombi zari zimaze iminsi zirwanira mu duce dutandukanye two muri Teritwari ya Masisi.
M23 biciye mu bayobozi bakuru bayo, yatangaje ko mu gitondo cyo kuri uyu wa Gatandatu ihuriro ry’ingabo za Guverinoma ya Congo Kinshasa zagabye ibitero ku birindiro byayo zikoresheje indege z’intambara (Sukhoi-25) ndetse n’ibibunda biremereye.
Ni ibitero uyu mutwe uvuga ko biri kugabwa mu duce twa Kibumba na Buhumba duherereye mu bilometero bibarirwa muri 20 uvuye mu mujyi wa Goma.
Imirwano hagati y’impande zombi yubuye ku itariki ya 1 Ukwakira 2023, nyuma y’amezi atandatu y’agahenge.
Kuva icyo gihe impande zombi zagiye zibanda mu duce twa za Teritwari za Masisi na Nyiragongo, aho M23 imaze igihe yigarurira uduce dutandukanye.
Uyu mutwe kuri ubu uvuga ko kuri ubu abarwanyi bawo bahanganye n’umwanzi, mu rwego rwo kurinda abasivile.
