Imirwano ikomeye hagati y’ihuriro ry’Ingabo za Guverinoma ya Repubulika Iharanira Demokarasi ya Congo n’inyeshyamba zo mu mutwe wa M23, yaramukiye muri Teritwari ya Masisi.
FARDC n’abafatanyabikorwa bayo (FDLR, Abacancuro, imitwe ya Wazalendo, Ingabo z’u Burundi ndetse n’iz’umuryango wa SADC) bamaze igihe bagaba ibitero karahabutaka ku nyeshyamba za M23 bagamije kureba uko bazirukana mu bice bya Teritwari ya Masisi igenzura.
Ni imirwano yatangiye gufata indi ntera mu kwezi gushize kwa Mutarama, ndetse abakurikiranira hafi iby’iyi ntambara bateganya ko ishobora gukomera kurushaho muri uku kwezi kwa Gashyantare, bijyanye n’uko abo M23 ihanganye na yo bateganya kuyiviraho inda imwe mu rwego rwo kuyitsinsura burundu.
Umuvugizi w’uyu mutwe, Lawrence Kanyuka avuga ko imirwano yakomeje, nyuma y’uko Ingabo za Leta ziteye ibirindiro bitandukanye byawo muri Teritwari ya Masisi.
Kanyuka yanditse ku rubuga rwe rwa X ko “Ingabo zihuje z’ubutegetsi butemewe bwa Kinshasa zirimo FARDC…zasubukuye ibitero ku basivile mu duce dutuwe cyane i Mweso, Mushaki, Karuba no mu nkengero zaho. Ziri kwifashisha imbunda z’imizinga, ibifaru by’intambara na za drones.”
Kanyuka yibukije umuryango mpuzamahanga n’imiryango y’ubutabazi ko ibitero ingabo za Leta ya Congo ziri kugaba imweso bigamije “kurimbura abaturage”, agaragaza ko kuba ntacyo iyo miryango iri kubikoraho ari ibyo kwamaganwa.
Imirwano yo kuri uyu wa Gatanu ije ikurikira indi karahabutaka yiriwe ibera muri Teritwari ya Masisi.
Ni imirwano yasize M23 ku ruhande rwayo ivuga ko yigaruriye uduce dutandukanye, turimo Rushoga, Majagi na Kabashumba duherereye ku bilometero bitanu uvuye ahitwa Ngungu nk’uko ihuriro Alliance Fleuve Congo M23 ibarizwamo ryabitangaje.
M23 kandi ku mugoroba wo ku wa Kane yatangaje ko yigaruriye umusozi muremure wa Kagano nyuma yo kuwirukanaho ihuriro ry’ingabo za Leta.
One Response
M23 Vs FARDC: Ku rugamba haramutse makuru ki?
M23 ubutuvugana bayikubitiye kumusozi kagano murucyerera irahunga barikuyikurikirana bayizibiye amayira ayigeza murubaya aho bishakiraga amabuye yagaciro none bayikubitiye ahareba inzega murucyerera.