Ikipe ya APR BBC mu bagabo n’abagore mu mukino wa Basketball, yatsinze aya REG mu mikino y’ishiraniro.
Kuri uyu wa Gatanu tariki ya 29 Werurwe 2024 nibwo hari hakomeje imikino ya shampiyona y’icyiciro cya mbere muri Basketball.
Iyi mikino yari yakomeje aho mu bagore APR WBBC yatsinze REG WBBC amanota 77-75 ni mu gihe mu bagabo APR BBC yatsinze REG BBC 78-75.
REG BBC yinjiye mu mukino neza aho ibifashijwemo n’abakinnyi nka Shyaka Olivier begukanye agace ka mbere ku manota 24-17.
APR BBC yagarutse mu gice cya kabiri ishaka gutsinda ndetse biranabahira aho babifashijwemo n’abarimo Nshobozwabyosenumukiza bagatsinze 27 -12.
Amakipe yombi yagiye mu karuhuko ka Kabiri APR BBC iri imbere n’amanota 44 kuri 36 ya REG BBC.
APR BBC yahuye n’uruva gusenya aho REG BBC yayicanyeho umuriro maze ibifashijwemo n’abarimo nka Pitchou Manga, Antino Alvarezes wabonaga ari mu mukino neza, bayitsinze amanota 19 itaratsinda inota na rimwe.
APR BBC yabonye inota rya mbere ubwo hari hasigaye iminota 3 n’amasegonda 28 ngo aka gace karangire. Ni inota ryatsinzwe na Zion Style kuri ’Free throw’. Aka gace REG BBC yakegukanye ku manota 25-11.
APR yaje mu gace ka nyuma ikina ari ugupfa no gukira, Nshobozwa na Adonis mu minota ya 3 ya gace ka nyuma bari bamaze kugabanya ikinyuranyo hasigayemo amanota 3 muri 6 barushwaga. Pitchou wa REG yahise atsinda amanota 2 na Antino Alvarezes atsidna 3 hahita hajyamo amanota 8 y’ikinyurabyo.
Styles na Adonis batsinze amanota 2 buri umwe, Nshobozwa atsinda 3 bifasha APR gusatira REG aho ku minota ibiri ya nyuma hari hasigayemo inota 1.
Amanota abiri ya Zion Styles yatsinze kuri “free throw” habura amasegonda 18, yafashije APR kuyobora irusha REG inota rimwe (byari 76-75).
Uyu musore wigaragaje cyane mu gace ka nyuma, habura amasegonda abiri, ku makosa y’abakinnyi ba REG BBC, Zion Styles yakiriye umupira mwiza yahawe na Ntore Habimana maze atsinda andi manota 2 kuri “dunk”. Byari bivuze ko ishyizemo amanota 3 y’ikinyuranyo. Aka gace APR BBC yagatsinze ku manota 23-14. Umukino warangiye APR BBC iwegukanye ku manota 78-75.
Antino Alvarezes wa REG ni we watsinze amanota menshi 22, yakurikiwe na Kambuyi Manga Pitchou bakinana watsinze 20 ni mu gihe Nshobozwabyosenumukiza Jean Jacques Wilson wa APR yatsinze 19.
Uyu mukino wari wabanjirijwe n’uwo APR WBBC yatsinzemo REG WBBC amanota 77-75.
Uyu mukino bakaba bitabaje iminota 5 y’inyongera kuko 40 isanzwe yarangiye amakipe yombi anganya 64-64.
