Abagenzi 61 baburiye ubuzima mu ndege yakoreye impanuka muri leta ya São Paulo yo muri Brazil ku mugoroba wo kuri uyu wa Gatanu taliki 09 Kanama 2024.
Iyi ndege ya Voepass ‘ATR 72-500’ yavaga i Cascavel muri leta y’Amajyepfo ya Paraná yerekeza ku kibuga cy’indege cya Guarulhos mu mujyi wa São Paulo ubwo yamanukaga mu mujyi wa Vinhedo.
Amashusho azenguruka ku mbuga nkoranyambaga, yerekana indege imanuka izunguruka mu kirere Mbere yo kugwa.
Iyi ndege ikaba yari itwaye abagenzi 57 n’abakozi bane bayikoragamo. Abayobozi b’inzego z’ibanze bavuga ko nta barokotse.
Mu butumwa Perezida wa Brazil, Luiz Inácio Lula da Silva, yanyujije ku rubuga nkoranyabaga rwa X, yavuze ko bababajwe n’iyi mpanuka ikomeye yatwaye ubuzima bw’abari mu ndege bose.
Yavuze ko impamvu y’iyo mpanuka itahise imenyekana, asaba buri muntu gufata umunota wo kunamira ababuriyemo ubuzima.
