Minisitiri w’Ububanyi n’Amahanga wa Misiri, Badr Abdelatty, yemeje ko iki gihugu kiyemeje guha u Rwanda inkunga y’ibikoresho bifite agaciro ka miliyoni 3 z’Amadolari ya Amerika, bizakoreshwa muri ibi bitaro.
Ibi Minisitiri Badr, yabitangaje nyuma y’uko Guverinoma y’u Rwanda n’iya Misiri basinyanye amasezerano y’ubufatanye mu nzego zirimo ubuvuzi, ubwikorezi n’izindi.
Kuri uyu wa Mbere, tariki ya 12 Kanama 2024, nibwo hashyizwe umukono kuri aya masezerano mu gihe Minisitiri w’Ububanyi n’Amahanga wa Misiri, Badr Abdelatty, akomeje kugirira uruzinduko i Kigali.
Ku ruhande rw’ibirebana n’iby’ubuzima Minisitiri Dr. Sabin Nsanzimana uyobora iyi Minisiteri, ni we washyize umukono kuri ayo masezerano naho ku ruhande rwa Misiri ashyirwaho umukona na Badr Abdelatty.
Aya masezerano yasinyiwe i Masaka mu Karere ka Kicukiro, ahari kubakwa Ikigo cya My Heart Center kizajya gitanga serivisi zo kuvura indwara zifata umutima.
Uretse urwego rw’ubuzima rwashyize umukono kuri aya masezerano,Minisiteri y’Ububanyi n’Amahanga y’u Rwanda , iyobowe na Amb Olivier Nduhungirehe n’iya Misiri iyobowe na Minisitiri Badr Abdelatty, bashyize umukono ku masezerano ajyanye n’ubufatanye mu by’ubwikorezi.
Misiri n’u Rwanda, ni ibihugu bisanzwe bifitanye umubano ushingiye mu guhana abakozi no mu bya Gisirikare.
