Diviziyo ya kabiri n’iya gatanu yo mu ngabo z’u Rwanda (RDF) n’iya kabiri yo mu za Uganda (UPDF), zahuriye mu nama igamije gushimangira ubufatanya bwambukiranya imipaka ndetse no gukumira ibyaha byambukiranya imbibi z’ibihugu byombi.
Ni inama yabereye i Mbarara muri Uganda.
Intumwa za RDF muri iyi nama zari ziyobowe n’Umugaba w’Ingabo zirwanira ku butaka, Maj Gen Vincent Nyakarundi, mu gihe iza Uganda zari ziyobowe na Maj Gen James Birungi ukuriye ubutasi bwa gisirikare bw’iki gihugu.
RDF yatangaje ko impande zombi zaganiriye “ku buryo bwo gukumira ibikorwa bitemewe byambukiranya imipaka ndetse n’ingamba zo gukemura ibibazo abaturage bahuriye imipaka bahura na byo”.
Umugaba w’Ingabo za Uganda zirwanira ku butaka, Lt Gen Kayanja Muhanga wari umushyitsi mukuru muri iriya nama, yashimye RDF na UPDF ku mbaraga bakomeje gukoresha mu gusigasira umutekano ku mipaka ihuza u Rwanda na Uganda.
Yunzemo ko mu bihe byashize Abagaba bakuru b’Ingabo z’ibihugu byombi bagiye bahurira mu nama zitandukanye mu rwego rwo gushimangira umubano w’amateka bimaze igihe bifitanye.
Ati: “Biciye mu miyoborere n’umuhate w’abakuru b’ibihugu byombi, nyakubahwa Paul Kagame na nyakubahwa Yoweri Museveni, twakoze inama zitandukanye zigamije gukemura ibibazo by’umutekano by’umwihariko ku mupaka. Nta gushidikanya ko iyi gahunda izateza imbere ubwumvikane hagati y’ibihugu kandi igatuma habaho impinduka n’imibereho myiza.”
Maj Gen Nyakarundi mu izina rya RDF yashimiye UPDF ku bw’ingufu ishyira mu gukumira ibikorwa bitemewe byambukiranya imipaka, yizeza ko RDF yiteguye gutanga umusanzu wayo mu gukumira ibyaha byambukiranya imipaka ndetse no gukumira iterabwoba mu karere.
Inama ya UPDF na RDF yo muri Uganda ije ikurikira iyo impande zombi zahuriyemo muri Gicurasi, i Nyagatare mu ntara y’iburasirazuba.
