Abasirikare 32 bo mu ngabo za Repubulika Iharanira Demokarasi ya Congo (FARDC) ndetse n’abasivile 11, bafunzwe bakurikiranweho ibyaha birimo icyo gucura umugambi wo guhirika ubutegetsi bwa RDC.
Aba basirikare barimo ufite ipeti rya Général de Brigade witwa Inyengele Bakati Erickson.
Ku wa Mbere tariki ya 16 Nzeri ni bwo Urukiko Rukuru rwa Gisirikare rufite icyicaro kuri gereza ya gisirikare ya Ndolo rwatangiye kubaburanisha.
Mu rubanza rwabo ubushinjacyaha bwavuze ko bubakurikiranyeho ibyaha birimo “gucura umugambi wo gusenya no gukuraho ubutegetsi bwemewe n’itegekonshinga buriho” ndetse no “kunanirwa gutanga amakuru ku cyaha cyakozwe n’umuntu ukurikiranwe n’ubutabera mu rukiko rukuru rwa gisirikare”.
Muri uru rubanza ntihasobanuwe uko abaregwa bakoze biriya byaha, bijyanye no kuba ababunganira mu mategeko basabye ko urubanza ruba rusubitswe by’agateganyo mu gihe barimo gutegura uko babasabira gufungurwa by’agateganyo.
Ni ubusabe ubushinjacyaha bwemeye mu gihe hagitegerejwe ko urubanza rusubukurwa mu cyumweru gitaha.
