Bwiza

Abaherwe n'impuguke bateraniye i Kigali mu nama ku iterambere rya Afurika

Amakuru•
Denis Nsengiyumva
By Denis Nsengiyumva
•Ku Cyumweru, 22 Ugushyingo 2026 saa 05:26
Abaherwe n'impuguke bateraniye i Kigali mu nama ku iterambere rya Afurika

‎Abaherwe bakomeye muri Afurika, abayobozi b’ibigo by’ubucuruzi, impuguke mu bukungu n’abahoze mu nzego nkuru za Leta bateraniye i Kigali mu nama igamije kuganira ku ngamba zo guteza imbere ubukungu bw’umugabane wa Afurika.
‎
‎Iyi nama izwi nka African Renaissance Group (ARG) Retreat, ihuza abaherwe bakomeye muri Afurika, abayobozi b'ibigo by'ubucuruzi, impuguke mu by'ubukungu n'abahoze ari abayobozi nuri za leta, igiye guteranira ku nshuro ya 3 i Kigali.
‎
‎Ni inama igamije kuganira ku ngamba zo guteza imbere ubukungu bw’umugabane wa Afurika, aho abayobozi n'abafite aho bahuriye n'ibikorwa by'ubukungu bicara bakungurana ibitekerezo ku bibazo byugarije umugabane n’uko byashakirwa ibisubizo.
‎
‎Umuherwe wa mbere muri Afurika, Umunyanijeriya, Aliko Dangote, washinze Dangote Group; Umuyobozi Mukuru w’Umuryango Mpuzamahanga w’Ubucuruzi (WTO), Ngozi Okonjo-Iweala; umuherwe Mo Ibrahim washinze Mo Ibrahim Foundation, ndetse na Hailemariam Desalegn wahoze ari Minisitiri w’Intebe wa Ethiopia, bamaze kugera mu Rwanda bitabiriye iyi nama.
‎
‎Usibye aba, hari kandi na Fred Swaniker, washinze Sand Technologies akaba n’Umuyobozi Mukuru wayo; Acha Leke, umwe mu bayobozi bakuru muri McKinsey; Vera Songwe, Umuyobozi Mukuru wa Liquidity and Sustainability Facility (LSF), na Roman Tesfaye, umugore wa Hailemariam Desalegn.
‎
‎Abinyujije kuri X kuri uyu wa Gatandatu, itariki 21 Ugushyingo 2026, Ngozi Okonjo-Iweala yavuze ko iyi nama yahuje abayobozi bakomeye bo mu nzego za Leta n’iz’abikorera muri Afurika, baganira ku buryo ubukungu bw’umugabane bwakomeza gutera imbere, harimo no guteza imbere ubucuruzi.
‎
‎Iyi nama igamije gushakira hamwe ibisubizo ibibazo bikomeye byugarije Afurika no kuganira ku ngamba zafasha umugabane kugera ku iterambere rirambye.
‎
‎Umuherwe Dangote yashinze African Renaissance Retreat nk’urubuga ruhuza Abanyafurika bafite uruhare rukomeye mu miyoborere n’ubukungu, kugira ngo bungurane ibitekerezo byafasha mu iterambere ry’umugabane.
‎
‎Inama iheruka yabaye mu 2025, yitabiriwe n'abayobozi bakuru barimo Perezida Paul Kagame, Thabo Mbeki wahoze ayobora Afurika y’Epfo, Olusegun Obasanjo wahoze ayobora Nigeria, Ellen Johnson Sirleaf wahoze ayobora Liberia na Hailemariam Desalegn.
‎
‎Yanitabiriwe n’abashoramari bakomeye barimo Tony Elumelu, Patrice Motsepe, Tidjane Thiam, Vera Songwe, Abdul Samad Rabiu, Mohammed Dewji, Naguib Sawiris, Femi Otedola na James Mwangi.

Denis Nsengiyumva

Inkuru yanditswe na: Denis Nsengiyumva

Umunyamakuru wa BWIZA.COM wanditse inkuru 11,310.