Abasirikare bakuru ku ipeti rya jenerali mu nzego z’umutekano za Uganda, bashobora gufatirwa ibihano na Leta Zunze Ubumwe za Amerika mu gihe amatora ya perezida ateganyijwe kuwa 14 Mutarama 2021yaba abaye mu kavuyo. Umunyamabanga wa Leta ya Amerika, Mike Pompeo kuwa Kane tariki 17 Ukuboza 2020 kuri Twitter yavuze ko ” Turi gukurikiranira hafi ibikorwa by’abantu bashaka kubangamira inzira ya demukarasi iri muri Uganda.” Pompeo avuze atya nyuma y’aho umudemukate uvuga rikijyana akaba n’umuyobozi wa Komite ishinzwe ububanyi n’amahanga, Eliot L. Engel wari wavuze ko hari ihonyorwa ry’uburenganzira bwa muntu muri Uganda. Uyu yavuze ko niharamuka habaye akaduruvayo mu matora, abajenerali bakurikira bafatirwa ibihano na Amerika: Aba barimo: Umugaba w’Ingabo zirwanira ku Butaka, Lt. Gen. Peter Elwelu, Maj.Gen. James Birungi uyobora ingabo zidasanzwe za Uganda (SFC), Maj. Gen. Don William Nabasa wahoze ayobora SFC, Maj. Gen. Abel Kandiho, uyobora urwego rw’iperereza rya gisirikare (CMI), Umuyobozi wungirije wa Polisi, Maj. Gen. Sabiiti Steven Muzeeyi. Kuri aba kandi hiyongeraho komiseri wa polisi, Andrew Mwesigwa na Col. Chris Serunjogi Ddamulira ushinzwe kugenza ibyaha muri polisi ya Uganda. Ibi ni nyuma y’aho Gen. kale Kayihura Muhwezi wahoze ayobora polisi afatiwe ibihano na Amerika ku byaha byo guhohotera ikiremwamuntu. Chimpreports ivuga ko ibi bihano bisabwa na Eliot bishobora kuba biterwa n’uko Uganda yateye utwatsi iby’ubutinganyi.
