Abagize Ikipe y’Igihugu ya Sénégal bashimiwe byihariye na Perezida Macky Sall wa kiriya gihugu, nyuma yo kugihesha ishema begukana Igikombe cya Afurika ku nshuro ya mbere.
Ku Cyumweru gishize ni bwo Les Lions de la Téranga yegukanye Igikombe cya Afurika cya mbere cyayo mu mateka, nyuma yo gutsinda ku mukino wa nyuma Misiri bari banganyije 0-0 kuri Penaliti 4-2.
Ejo ku wa Kabiri ni bwo abakinnyi ba Sénégal bakiriwe na Perezida Macky Sall mu rwego rwo kubashimira, mu muhango wabereye kuri Perezidansi ya Sénégal witabiriwe n’abantu b’ingeri zitandukanye.
Perezida Sall yahamagaraga abakinnyi umwe ku wundi, akamwambika umudali uzwi nka ‘Ordre national des lions’ wa mbere w’igiciro cyinshi muri Sénégal.
Abantu 52 bari bagize ikipe ya Sénégal yatwaye Igikombe cya Afurika cya 2021 ni bo bagizwe na Perezida Macky Sall ba ‘Captain’ na ba ‘Commandant’ ba Ordre National des Lions.
Usibye kwambikwa iyi midari, buri umwe mu bakinnyi ba Sénégal yahawe ishimwe rya miliyoni 50 z’ama CFA (arenga Frw miliyoni 90), ikibanza cya metero kare 200 mu mujyi wa Dakar ndetse n’ubutaka bwa metero kare 500 mu gace ka Diamniadio.
Kapiteni Kalidou Koulibaly wavuze mu izina rya bagenzi be, yashimiye Leta ya Sénégal n’umutoza Aliou Cissé ku bw’umusanzu wabo mu gutuma iriya kipe itwara Igikombe cya Afurika.
Ati: “Coach, wari umu-Kapiteni w’umunyamurava, none watwaye igikombe. Wowe n’abakungirije magize umusanzu ukomeye ku ntsinzi yacu. Wakoranye ubushishozi no gukunda igihugu, ubwitange; ariko hejuru ya byose hari icyizere. Umusaruro nguyu.”
