Ubushakashatsi bw’ikigo Public Health England (PHE) bwerekanye ko abantu bakize COVID-19 baba bafite ubudahangarwa bw’umubiri mu mezi atanu ashize bakize iki cyorezo, ariko ko nyuma y’aho bashobora kwanduza abantu n’ubwo atari uko bigenda ku bayikize bose. Ubushakashatsi bwakorewe mu Bwongereza mu bakozi bakora mu nzego z’ubuzima, bwerekanye ko abakize Coronavirus bashobora kuba ikibazo kuko bakwanduza abandi gusa ngo si bose. Iyi ni ingingo ituma ababukoze bavuga ko abayikize badakwiriye gukorerwa ivangura. Ku bayikize bagifite ubwirinzi, ubushakashatsi bwa PHE buvuga ko mu mezi atanu baba badashobora kongera kwandura ku gipimo cya 83% ariko ko bishoboka ko baba bagifite iyo virusi mu muhogo no mu mazuru, bityo bakaba bakwanduza abandi bantu, ingingo yo kwitonderwa. Mu bantu 6,646 bagize uruhare mu bushakashatsi, 44 bongeye kwandura. Prof. Susan Hopkins wayoboye ubu bushakashatsi akaba n’umujyanama wa PHE, avuga ko ” Ubu bushakashatsi bwatweretse uburyo butarimo urujijo ku bijyanye n’ubudahangarwa bwa muntu ku guhangana na COVID-19 ariko abantu ntibakwiriye kutumva neza ibyavuye mu bushakashatsi bukozwe hakiri kare.” Prof. Hapkins ati ” Icyo tuzi ni uko abantu bigeze kwandura, bagakira, baba bagize ubudahangarwa bwo kutongera kwandura ariko si bose kandi ntituzi neza igihe ubu budahangarwa bumara. Icy’ingenzi ni uko tuzi neza ko umuntu ashobora gukomeza kwanduza virusi ya Corona.” Uyu avuga ko hari icyo bivuze. Ati ” Ibi bivuze ko niba uziko wanduye, ugakira ubu ukaba wibwira ko ubu utakwandura, menya ko wakwandura, ukananduza abandi.” Avuga ko abantu badakwiriye kureka ingamba bagirwa n’inzego z’ubuzima kugira ngo bakize ubuzima bw’abandi.
