Abarimo Kayirebwa, Fally Ipupa na Buravan bahuriye mu ndirimbo yibutsa bene muntu ko ari umwe

Abahanzi batangukanye biganjemo aba hano ku mugabane wa Afurika, bahuriye mu ndirimbo bise “Together as One” yibutsa abatuye Isi bose ko ari umuntu umwe.

Cécile Kayirebwa na Yvan Buravan ni bo Banyarwanda baririmbye muri iyi ndirimbo, abandi bakaba ari DJ Khadja Nina ukomoka i Burundi, Maurice Kirya wo muri Uganda, Fally Ipupa wo muri Republika iharanira Demokarasi ya Congo, Mahombi ukomoka muri Congo Brazzaville, Ismail Lo wo muri Senegal, Afia Mala wo muri Togo, Kassav yo mu birwa bya Carraibes na Justin Vala wo muri Madagascar.

Iyi ndirimbo kandi irimo Umwongerezakazi, Naomi Campbell na Jerry Rawling wigeze kuyobora Ghana.

Ubutumwa bw’iyi ndirimbo bwibutsa abatuye isi ko ari bamwe, bityo bakaba nta cyagakwiye kubavangura.

Ni indirimbo baririmbye, mu gihe hirya no hino ku Isi hakunze kugaragara ivangura rishingiye ku ruhu, imyemerere, amoko, amashyaka ya Politiki n’ibindi.

Abaririmbye “Together as One” kandi ku musozo wayo baha icyubahiro abandi banyabigwi mu muziki batabarutse, barimo Miriam Makeba, Bob Marley, Umunya Cameroon Manu Di Bango na Mory Kante uri mu batangiye umushinga w’iriya ndirimbo mbere yo kwitaba Imana muri Werurwe uyu mwaka.

Biteganyijwe ko iyi ndirimbo imurikwa kuri uyu wa 25 Gicurasi, mu gitaramo Kayirebwa azaririmbamo ubwo hazaba hizihizwa umunsi ngarukamwaka wahariwe umugabane wa Afurika.

Ni igitaramo kizayoborwa n’Umwongereza Idris Elba, kikazaririmbamo n’ibindi byamamare bitandukanye birimo nka Burna Boy, Sho Madjozi, Tiwa Savage, AKA, Diamond Platnumz, Nasty C, Sauti Sol, Yemi Alade, Fally Ipupa, StoneBwoy, Teni, Angelique Kidjo n’abandi.

Intego y’iki gitaramo ni ugukusanya amafaranga agomba kwifashishwa mu kugoboka Abanyafurika batandukanye bagizweho ingaruka na Covid-19.