Abasirikare 11 bo mu ngabo za Repubulika Iharanira Demokarasi ya Congo n'abasivile babiri bapfiriye mu mpanuka y'indege, ubwo indege nto barimo yakoreraga impanuka mu mujyi wa Kenge, mu Ntara ya Kwango.
Iyi mpanuka yabaye kuri uyu wa Gatanu, tariki ya 25 Nzeri 2026, ubwo iyo ndege yari ivuye i Kikwit.
Iyi ndege yahanutse mu gace ka Manzawu, muri Komini ya Masikita, muri Kenge. Abayobozi bo mu Ntara ya Kwango bavuze ko nta muntu n’umwe warokotse.
Mu bahitanywe n’iyi mpanuka harimo Lieutenant-General Lucien-René Likulia Bakumi wari Umushinjacyaha Mukuru wa Gisirikare muri RDC na Lieutenant-General Joseph Mutombo Katalayi Tiende, wari Perezida wa mbere w'urukiko rukuru rwa gisirikare.
Iyi ndege kandi yarimo abandi basirikare barimo major n’uwari ufite ipeti rya capitaine, ndetse n’abasivili. Abandi basirikare bakuru bo mu rwego rw’ubutabera bwa gisirikare na bo bari muri iyo ndege.
Ba Jenerali bari muri iriya ndege bombi bapfuye mu gihe bari bafite uruhare mu manza zikomeye zaregwagamo abayobozi n’abasirikare bakuru ba FARDC.
Mu mezi ashize, Likulia yari ayoboye Ubushinjacyaha bwa Gisirikare mu rubanza ruregwamo bamwe mu basirikare bakuru, barimo Gen. Christian Tshiwewe ndetse na General John Numbi. Mutombo na we ni we wayoboraga inteko y’abacamanza muri urwo rubanza.
Kugeza ubu, impamvu nyayo yatumye iyo ndege ihanuma ntiratangazwa.