Akanama k’uburenganzira bwa muntu ko muri Niger, kashinje abasirikare b’iki gihugu kwica abaturage 70 ku maherere, mu bikorwa ingabo za Niger zirimo byo kurwanya imitwe y’iterabwoba.
Aka kanama kavuze ko katahuye imirambo irenga 70 mu byobo rusange bitandatu mu karere ka Tillabéri kari mu majyaruguru ashyira uburengerazuba bw’igihugu.
Tillabéri gasanzwe ari akarere kibasiwe n’ibikorwa by’urugomo rw’intagondwa zigendera ku mahame akaze ya k’Islam. Ni ubwicanyi bwabaye mu ntangiriro y’uyu mwaka.
Umwe mu bakoze iryo perereza yavuze ko abo baturage bicishijwe intwaro gakondo nk’amacumu n’imihoro.
Imiryango mpuzamahanga iharanira uburenganzira bwa muntu yakomeje gushinja ingabo z’ibihugu bya Niger, Mali na Burkina Faso kwica abasivile babarirwa muri za mirongo, mu bwicanyi burenze ku mategeko mu bikorwa byo kurwanya intagondwa mu karere ka Sahel.
Inkuru ya BBC ivuga ko akanama k’uburenganzira bwa muntu ka Niger karimo gukora iperereza ku birego byuko abaturage b’abasivile 102 baburiwe irengero hagati y’itariki ya 27 Gicurasi n’iya 02 Mata muri ako karere karangwamo umutekano muke.
Abdoulaye Seydou, ukuriye umuryango ‘Réseau Panafricain Pour la Paix, la Démocratie et le Développement’ wagize uruhare muri iryo perereza, yavuze ko iperereza ryatahuye imirambo itari munsi ya 71 mu byobo rusange bitandatu.
Ni na ho ahera asaba ababishinzwe kugira ibyo babaza igisirikare ku bijyanye n’aba bantu basanzwe muri ibi byobo.
