Afurika y'Epfo: Abandi bantu 27 biciwe mu gitero ku kabari n'aho bidagadurira

‎Abantu 27 nibo biciwe mu irasa mu kivunge ryabaye inshuri ebyiri mu masaha atandukanye ryabereye muri Afurika y'Epfo, biba kimwe mu bikorwa by'urugomo byakoreshejwemo imbunda cyahitanye abantu benshi mu gihugu, bikaba bibaye nyuma y'iminsi abandi bantu 11 biciwe muri "house party".
‎
‎Abantu 17 bishwe ubwo abantu umunani bitwaje imbunda bateraga akabari gaherereye hafi ya Johannesburg mu ijoro ryo kuwa Gatandatu, mu gihe abandi 15 bakomeretse.
‎
‎Mu kindi gikorwa nk'iki gitandukanye mu gitondo cyo kuri iki Cyumweru, itariki 27 Nzeri 2026, abantu 10 biciwe hanze y’ahantu ho kwidagadurira mu mujyi uri hafi ya Cape Town, abandi 11 barakomereka nk'uko inkuru dukesha BBC ivuga.
‎
Afurika y'Epfo ni hamwe mu hantu ha mbere habera ubwicanyi bwinshi bwa hato na hato ku Isi kandi igihugu cyakunze kugorwa no gukumira urugomo rushingiye ku matsinda y’abagizi ba nabi muri iyi myaka ishize. Polisi ntiyigeze igaragaza impamvu y’ibi bitero biheruka.
‎
Mu mujyi wa Johannesburg, biravugwa ko abantu bitwaje imbunda barashe abakiriya bari hanze y’akabari mbere yo gukomereza igitero imbere banatwika imodoka ebyiri mbere yo guhunga.
‎
Polisi yavuze ko abagabo cumi na batatu n’abagore bane bishwe, yongeraho ko impamvu y'ubu bwicanyi itazwi neza.
‎
Mu mujyi wa Cape Town, abantu batanu bapfiriye aho nyuma yo kuraswa, naho abandi batanu bapfira mu bitaro. Hari hatarafatwa umuntu n'umwe waba wagize uruhare muri ibyo bitero byombi kugezamu gitondo cyo kuri iki Cyumweru.
‎
‎Ubu bwicanyi bwombi bwakoreshejwemo imbunda byabaye nyuma y'iminsi mike abantu 11 biciwe mu mujyi wa Durban ubwo kuwa Kabiri ushize abantu bitwaje intwaro bagabaga igitero ku nzu yaberagamo "house party" iri mu mujyi wa KwaMakhutha.