Algeria yarashe drone y’Igisirikare cya Mali

Algeria yarashe drone y’Ingabo za Mali mu ijoro ryo ku wa Mbere, itariki ya 31 Werurwe rishyira kuri uyu wa Kabiri ushize itariki ya 1 Mata 2025 ku mupaka uhuza ibihugu byombi.

Mu itangazo rigenewe abanyamakuru ryashyizwe ahagaragara ku itariki ya 1 Mata, Igisirikare cya Mali cyababajwe no gutakaza “indege itagira abapilote” yacyo nkuko iyi nkuru dukesha RFI ivuga.

Bivugwa ko iyi drone “yaguye hafi ya Tinzaouatène, mu karere ka Kidal”, ku butaka bwa Mali.

Ku ruhande rwayo, Minisiteri y’Ingabo ya Algeria, mu itangazo ryashyizwe ahagaragara uwo munsi, ivuga ko habaye “gutahura no kurimbura” iyi drone, nk’uko Algiers ibivuga, “yari yinjiye mu kirere cy’igihugu”.

Bamako ntacyo yavuze kuri iki kirego. Gusa, umwe mu bashinzwe umutekano muri Mali, yagize ati: “Turimo kugerageza kumva uko byagenze.”

Yongeyeho ko indege itagira abadereva yaguye ku ruhande rw’umupaka wa Mali asa nk’ushaka kwerekana ko yarasiwe mu kirere cya Mali.