Amerika yohereje itsinda rya gatatu ry’amato y’intambara arimo ubwato bunini butwara indege mu Burasirazuba bwo Hagati, mu gihe intambara hagati ya Amerika na Israel na Iran ikomeje kurangwa n’impaka ku ihagarikwa ry’imirwano.
Iri tsinda ry’amato ririmo USS Theodore Roosevelt, ubwato bunini butwara indege z’intambara, hamwe na USS Makin Island n’andi mato akoreshwa mu bikorwa byo gutwara no kumanura abasirikare ku butaka.
Muri rusange, ayo mato atwaye abasirikare b’abasare barenga 7,000 hamwe n’abasirikare ba Marines bagera ku 2,000.
Umuyobozi muri Minisiteri y’Ingabo za Amerika yabwiye Associated Press ko bishoboka ko mu mpera z’Ukwakira Amerika izaba ifite ubwato butatu butwara indege muri ako karere.
Iyo izi mbaraga zose zihurijwe hamwe n’izisanzwe muri Burasirazuba bwo Hagati, Amerika ishobora kuba ifite abasirikare b’abasare na Marines barenga 20,000, ndetse n’indege zibarirwa muri za magana.
Kugeza ubu, USS George H.W. Bush na USS George Washington ni amwe mu mato manini ya Amerika ari muri ako karere, mu gihe USS Boxer nayo iri mu bikorwa by’ingabo muri ako gace.
Perezida wa Amerika, Donald Trump, yavuze ko bishoboka ko nyuma y’amatora yo hagati muri manda ateganyijwe ku wa 3 Ugushyingo, Amerika yakongera ibitero by’indege kuri Iran.
Mu kiganiro yagiranye n’ikinyamakuru Time, Trump yavuze ko atashatse gutangaza amakuru arambuye ku hantu Amerika ishobora kugaba ibitero, avuga ko ibyo byaba ari uguhishura ingamba za gisirikare.
Trump kandi yavuze ko yanze icyifuzo cya Iran cyo guhagarika imirwano, avuga ko ibyo Iran yari yemeye bitari bihagije.
