Rutahizamu ukiri muto Ansu Fati ukinira ikipe ya FC Barcelona, yaciye agahigo kari kamaze imyaka 84 ko kuba umukinnyi wa kabiri ukiri muto kurusha abandi ukiniye ikipe y’Igihugu ya Espagne, La Fulia Roja.
Uyu mwana ukomoka muri GuinĂ©e-Bissau hano ku mugabane wa Afurika, ni umwe mu bigaragaje cyane muri FC Barcelona n’ubwo we na bagenzi be bagize umwaka mubi ntibagire igikombe na kimwe batwara.
Muri Kanama umwaka ushize ni bwo Ansu Fati yakiniye FC Barcelona umukino we wa mbere afite imyaka 16 n’iminsi 298, aca agahigo ko kuba umukinnyi ukiri muto wari ugaragaye muri La Liga. Fati yakomerejeho akinira FC Barcelona imikino 33 ayitsindamo ibitego umunani.
Kwitwara neza muri FC Barcelona mu mwaka we wa mbere, byahesheje Ansu Fati amahirwe yo guhamagarwa mu kipe y’Igihugu ya Espagne n’umutoza Luis Enrique.
Mu ijoro ryakeye ubwo Espagne yakinaga n’Ubudage mu mukino wa UEFA Nations league, Ansu Fati yinjiye mu kibuga mu gice cya kabiri cy’umukino asimbura Jesus Navas.
Ku myaka 17 n’iminsi 308, yahise aca agahigo ko kuba umukinnyi wa kabiri mu mateka ushoboye gukinira ikipe y’Igihugu ya Espagne, nyuma ya Angel Zubieta wayikiniye bwa mbere muri Gicurasi 1936 afite imyaka 17 n’iminsi 284, icyo gihe Espagne ikina na Czechoslovakia.
Fati kandi yabaye umukinnyi wa 800 ushoboye gukinira ikipe y’Igihugu ya Espagne, anaba umukinnyi wa mbere ukomoka muri GuinĂ©e-Bissau ushoboye gukinira La Roja.
Uretse Ansu Fati, undi mukinnyi waherukaga gukinira Espagne akiri muto ni Bojan Krkic wayikiniye umukino wa mbere muri 2008 ku myaka 18 n’iminsi 18, icyo gihe akaba na we yarakiniraga FC Barcelona.
Kwinjira mu kibuga kwa Ansu Fati kwafashije cyane ikipe y’Igihugu ya Espagne, bituma ibasha kwishyura igitego yari yatsinzwe na Timo Werner.
Espagne yishyuye ku munota wa nyuma ibifashijwemo na myugariro José Gaya.
Abandi bakinnyi bakiniraga Espagne umukino wa mbere ni Ferran Torres wa Manchester City na Mikel Merino wa Real Sociedad.
