Ikipe ya APR FC kuri uyu wa Kane, yageneye AS Kigali ubutumwa buyishimira, nyuma yo gusezerera KCCA FC yo muri Uganda muri CAF Confederation Cup.
Ejo ku wa Gatatu ni bwo AS Kigali yageze mu ijonjora rya nyuma rya CAF Confederation Cup, nyuma yo gusezerera KCCA ibifashijwemo n’igitego yatsindiye hanze.
Umukino ubanza wagombaga guhuriza amakipe yombi kuri Stade ya Kigali i Nyamirambo mu mpera za 2020 ntiwabaye, bitewe n’uko KCCA yari ifite umubare w’abakinnyi badahagije bo kuwukina kubera ko abenshi mu bakinnyi bayo bari baranduye COVID-19. Ni ibyatumye AS Kigali itera mpaga y’ibitego 2-0 iriya kipe y’i Kampala.
Mu mukino wo kwishyura wabereye i Kampala ku wa Gatatu tariki ya 6 Mutarama, AS Kigali yatsinzwe ibitego 3-1 (byose byatsinzwe na rutahizamu Brian Aheebwa) bituma amakipe yombi anganya ibitego 3-3 mu mikino yombi, gusa abanyamujyi bakomeza babifashijwemo n’igitego cyo hanze.
Igitego cyo ku munota wa 50 w’umukino cyanzinzwe na Hakizimana Muhadjiri ni cyo cyatumye AS Kigali igera mu ijonjora rya nyuma rya CAF Confederation Cup.
Ni igitego cyabonetse nyuma y’ikosa umunya-Nigeria Aboubakar Lawal yari akoreweho na myugariro w’iriya kipe y’Umujyi wa Kampala.
Mu itangazo APR FC yanyujije ku mbuga nkoranyambaga zayo, yashimiye AS Kigali ku bwo gusezerera KCCA.
Iti: “APR FC yishimiye ikipe ya AS Kigali nyuma yo gusezerera KCCA FC, igakomereza mu mikino ya kamarampaka izabafasha kugera mu matsinda ya CAF Confederation Cup.”
Iyi kipe y’Ingabo z’u Rwanda yakomeje ishimangira ko “Izakomeza kwishimira intsinzi yagezweho n’Abanyarwanda mu mikino itandukanye, kuko ari ishema ry’igihugu cyatwibarutse kandi bitera umwete n’abandi guharanira gutera intamwe ijya imbere.”
AS Kigali yifurijwe na APR FC amahirwe masa, igomba guhura n’imwe mu makipe yasezerewe mu ijonjora rya kabiri rya CAF Champions league izamenyekana tariki ya 18 Mutarama.
