APR FC yasinyishije undi rutahizamu

Ikipe y’Ingabo z’u Rwanda, APR FC yaraye isinyishije rutahizamu mushya uzayifasha mu gice cya kabiri cya Shampiyona y’ikiciro cya Mbere mu Rwanda.

Amakuru yatangajwe ku mugoroba wo ku wa Kabiri n’umunyamakuru Kalisa Bruno Taifa, yemeza ko rutahizamu Djibril Ouattara w’imyaka 25 y’amavuko yamaze gusinyira APR FC amasezerano y’imyaka ibiri.

Djibril Ouattara yatangiye gukina ruhago mu 2016-2017 mu ikipe ya Vitesse FC yo mu gihugu cye cya Burkina Faso. Nyuma y’umwaka umwe yerekeje muri ASF Bobo Douglas aho yigaragaje cyane mu mwaka wa 2017-2018 atwara igikombe cya shampiyona ndetse anayobora abatsinze ibitego byinshi muri uwo mwaka n’ibitego 15 ku myaka 19.

Imyitwarire ye myiza yamuhesheje amahirwe yo kugurwa na RS Berkane yo muri Maroc aho yatangiye kuyikinira mu mwaka wa 2019. Muri iyi kipe, Ouattara yagize uruhare rukomeye mu gutwara ibikombe bitandukanye birimo: CAF Confederation Cup muri 2019-2020, ibikombe bibiri bya Throne Cup mu 2020-2021 na 2021-2022.

Nubwo yitwaye neza muri iyi kipe yaje guhura n’ibibazo by’umwanya wo gukina bituma muri 2024 ajya muri JS Kabylie yo muri Algeria.

Nyuma yo gutandukana na JS Kabylie muri Mutarama 2025, Djibril Ouattara yahise asinyira APR FC agirwa umukinnyi wa gatatu mushya iyi kipe yaguze muri uku kwezi, nyuma y’abakinnyi babiri bakomoka muri Uganda: Hakim Kiwanuka na Denis Omedi.

Djibril Ouattara akinira ikipe y’igihugu ya Burkina Faso kuva mu 2018 aho amaze gukina imikino 14, atsinda ibitego bibiri. Mbere yo kugera mu ikipe nkuru, yanakinnye mu batarengeje imyaka 20 aho yafashije igihugu cye gutwara umudali wa zahabu mu mikino ya Afurika yo muri 2019 ari na we wari uyoboye abatsinze ibitego byinshi.

Djibril Ouattara azanye ubunararibonye muri APR FC akaba yitezweho kuzafasha iyi kipe kugera ku ntego zayo haba mu marushanwa yo mu gihugu ndetse no ku rwego mpuzamahanga.