Mu mpera z’icyumweru gishize za shampiyona ku mugabane w’u Burayi zari zakomeje hakinwa imikino y’umunsi wa kabiri n’uwa gatatu ya shampiyona, isiga amakipe ya Bayern Munich na Manchester City ahuye n’uruva gusenya.
N’ubwo shampiyona y’Abongereza igeze ku munsi wa gatatu wayo, Manchester City yakinaga umukino w’umunsi wa kabiri yari yakiriyemo Leicester City ku kibuga El Etihad.
Ni umukino warangiye Manchester inyagiwe ibitego 5-2, birimo bitatu byabonetse kuri za Penaliti.
Ni ibitego bya Jamy Vardy watsinze bitatu, James Madson watsinzemo kimwe na Youli Tielemans watsinze icya gatandatu kuri Penaliti.
Impozamarira za Manchester City zatsinzwe na Rihad Mahrez na Nathan Ake.
Muri iki gihugu kandi Manchester United yatsinze bigoranye Brighton ibitego 3-2, Chelsea igwa miswi na West Bromwich Albion ibitego 3-3; mu gihe kuri uyu wa mbere hateganyijwe umukino wa Liverpool na Arsenal.
Mu gihugu cy’Ubudage ho bakinaga umunsi wa kabiri wa shampiyona.
Inkuru nyamukuru muri iki gihugu ni uko ikipe ya Bayern Munich yari imaze igihe yarigize mpatsamakipe yanyagiwe na Hoffeneim ibitego 4-1.
Ni Bayern yihariye umupira ku rwego rwo hejuru, gusa gupfumurira mu rukuta rw’abakinnyi ba Hoffehneim biba ingorabahizi.
Ikipe ya Hoffehneim yayitanbiye ku munota wa 16 ubwo Umunya-Bosnia & Herzegovina, Ermin Bi?ak?i? yayitsindiraga igitego, Umunya-Israel Mun’as Dabour yongeramo icya kabiri ku wa 24 mbere y’uko Andrej Kramaric atsinda ibindi bitego bibiri.
Impozamarira ku ruhande rwa Bayern Munich yatsinzwe na Joshua Kimmich ku munota wa 36.
Mu gihe Bayern Munich yanyagirwaga, ikipe ya Borussia Dortmund na yo ntiyari yorohewe kuko yatsindwaga na Augsburg ibitego 2-0.
Inkuru nyamukuru mu gihugu cy’u Bufaransa ni uko ikipe ya PSG yabonye amanota atatu ya mbere, nyuma yo gutsinda Reims bari bahuriye mu mukino w’umunsi wa gatatu wa shampiyona ibitego 2-0.
Ni ibitego byombi byatsinzwe n’Umunya-Argentine Mauro Icardi.
Olympique de Marseille yo yanganyije na Metz igitego 1-1, na ho Olympique Lyonnais inganya na Lorient igitego 1-1.
Mu Butaliyani ikipe ya Juventus yaraye iguye miswi na AS Roma ibitego 2-2, byombi yatsindiwe na Cristiano Ronaldo.
Bibiri bya Roma byo byatsinzwe na Veretout.
Muri iki gihugu kandi AC Milan yatsinze Crotone ibitego 2-0, mu gihe Inter Milan ku wa Gatandatu yari yatsinze Fiorentina ibitego 4-3.
Mu gihugu cya Espagne Real Madrid yari yasuye Real Betis, iyitsinda bigoranye ibitego 3-2.
Ni ibitego bya Fede Valvelde, na Sergio Ramos.
I Madrid mu murwa mukuru kandi hari hategerejwe undi mukino w’umunsi wa kabiri wa La liga, wahuje ikipe ya Atletico Madrid na Granada.
Amaso yose yari ahanzwe Luis Suarez wavuye ku ntebe y’abasimbura agatsinda ibitego bibiri muri 6-1 ikipe yatsinze.
Mu gihe amakipe abiri y’i Madrid yakinaga umunsi wa kabiri, FC Barcelona yo yari yakiriye Villarreal mu mukino w’umunsi wa mbere wa shampiyona ya Espagne.
Ibitego 4-0 byose byinjiye mu gice cya mbere byari bihagije ngo ikipe y’umutoza Ronald Koeman itangirane insinzi ibyibushye muri shampiyona.
Ni ibitego bya Ansu Fati watsinze bibiri, icya Messi cya Penaliti ndetse n’icya kane myugariro Pau Torres yitsinze.
