Bayern Munich yegukanye igikombe cya shampiyona y’Abadage cya munani yikurikiranya

Ikipe ya Bayern Munich yegukanye igikombe cya shampiyona y’ikiciro cya mbere mu Budage ku ncuro ya munani yikurikiranya, nyuma yo gutsinda igitego 1-0 Werder Bremen.

Hari mu mukino w’umunsi wa 32 w’iyi shampiyona wakinwe kuri uyu wa kabiri, mbere y’uko hakinwa imikino ibiri igasozwa ku mugaragaro.

Igitego cy’Umunya-Pologne, Robert Lewandowski, cyo ku munota wa 43 w’umukino, ni cyo cyatandukanyije impande zombi gusa gisiga Bayern Munich yegukanye igikombe cya shampiyona y’uyu mwaka.

Gutsinda uyu mukino byatumye iyi kipe y’i Munich yuzuza amanota 76, ikaba irusha amanota 10 Borussia Dortmund ya kabiri.

Bisobanuye ko n’ubwo Dortmund yatsinda imikino itatu isigaje gukina Bayern Munich igatsindwa ibiri isigaje, igikombe cyaguma mu maboko ya Bayern Munich kuko yasigara irusha inota rimwe mukeba wayo.

Borussia Dortmund ibinyujije ku rubuga rwayo rwa Twitter, yashimiye Bayern Munich nyuma yo kwegukana kiriya gikombe.

Iyi kipe yagize iti”Turabashimira Bayern Munich ku bwo kwegukana igikombe cya shampiyona ya 2019/2020.”

Muri rusange Bayern Munich imaze kwegukana ibikombe 30 bya shampiyona y’Abadage, birimo umunani yatwaye yikurikiranya kuva muri 2010.

Mu myaka ibiri yari yabanje Borussia Dortmund ni yo yari yegukanye ibikombe bya shampiyona y’Abadage.