Ikipe y’Igihugu ‘Amavubi’ igizwe n’abakina imbere mu gihugu, yaguye miswi n’iya Congo Brazzaville ibitego 2-2, mu irushanwa ryateguwe na Ferwafa amakipe yombi yari yahuriyemo yitegura irushanwa rya CHAN riteganyijwe kubera mu gihugu cya Cameroon.
Ni mu mukino waberaga kuri Stade Amahoro i Remera.
Ikipe y’Igihugu ya Namibia iri mu makipe atatu yagombaga kwitabira iri rushanwa, gusa iza kubura ku munota wa nyuma bitewe n’uko hari bamwe mu bayigize banduye icyorezo cya Covid-19.
Congo-Brazza ni yo yafunguye amazamu mbere, Amavubi ayishyura mu minota ya nyuma y’umukino.
Rutahizamu Bersyl Obassi ni we wafunguriye Congo amazamu ku munota cyo ku munota wa 9, yongeramo igitego cya kabiri ku munota wa 26.
Ikipe y’Igihugu ‘Amavubi’ yagabanyije umwenda ku munota wa 28 w’umukino ibifashijwemo na Twizerimana Martin Fabrice, mbere y’uko amakipe yombi ajya mu kiruhuko.
Igice cya kabiri cy’umukino cyaranzwe n’impinduka eshanu ku ruhande rw’umutoza Mashami Vincent wakuye mu kibuga abarimo Niyonzima Olivier ‘Seif’ agasimburwa na Ruboneka Jean Bosco, Lague Byiringiro wasimbuye Iyabivuze OsĂ©e na Faustin Usengimana wafashe umwanya wa Manzi Thierry.
Rutahizamu Iradukunda Bertrand wa Gasogi United yinjiye asimbura Manishimwe Djabel, mu gihe Mico Justin yafashe umwanya wa Nshuti Dominique Savio.
Kera kabaye ku munota wa 88 w’umukino, Amavubi yishyuye binyuze kuri Mico Justin.
Amavubi azatangira CHAN 2021 akina n’Imisambi ya Uganda ku wa 18 Mutarama mu mukino uzabera kuri Stade de la RĂ©unification i Douala, akurikizeho Maroc bazahura ku wa 22 Mutarama; mbere yo guhura na Togo tariki ya 26 mu mukino uzabera kuri Stade ya LimbĂ© mu gace ka Buea.
