Bobi Wine asubiye kwiyamamaza yambaye ibimurinda amasasu

Ni mu rwego rwo gukaza umutekano we, bitewe n’uburyo akomeje gukumirwa n’abashinzwe umutekano; bagera ubwo barasa ibyuka biryana mu maso mu bayoboke be, rimwe na rimwe n’amasasu.

Nk’uko Bobi Wine yabitangarije ku rubuga rwa Twitter, ibikorwa cyo kwiyamamaza yabikomereje mu gace ka Kubuku, Budaka na Manafwa, ati: “Ubwacu ni ubutumwa bugana ku kwibohora.”

Ku bijyanye n’ibi bikoresho bimurinda amasasu, Bobi Wine yagize ati: “N’ubwo nanyura mu kibaya cy’igicucu cy’urupfu, ntabwo nzatinya ikibi, kuko Umwami ari kumwe nanjye.”

Bobi Wine yahisemo kwambara ubwirinzi

Tariki ya 1 Ukuboza 2020 ni bwo Bobi Wine yatangaje ko abaye asubitse ibikorwa byo kwiyamamaza. Ni nyuma y’aho inzego z’umutekano zari zimaze gukomeretsa umupolisi umurinda, ASP Kato na Dan Magic umutunganyiriza umuziki, bagatobora amapine y’imodoka ye ndetse bakayimena n’ikirahuri cy’imbere.

Kuri uyu wa 2 Ukuboza 2020, uyu mukandida yavuze ko yagiye ku biro bya Komisiyo y’Igihugu y’Amatora, kubaza niba ari yo iri kugenzura ibikorwa byo kwiyamamaza cyangwa se niba ari abashinzwe umutekano bakomeje kumuzitira.