Imiryango itishoboye yo mu Murenge wa Cyanika, mu Karere ka Burera, ho mu Ntara y’Amajyaruguru kuri uyu wa Gatatu yagabiwe inka zigera kuri 20 n’Umukuru w’igihugu, Paul Kagame.
Uyu muhano wabereye mu Kagari ka Kabyiniro, mu Murenge wa Cyanika, uyobowe na Guverineri w’Intara y’Amajyaruguru, JMV Gatabazi aherekejwe na Maj. Gen. Eric Murokore, Umuyobozi w’Inkeragutabara muri iyi Ntara, ari nabo bashyikirije aba baturage izi nka.
Nk’uko iyi nkuru dukesha Imvaho Nshya ikomeza ivuga, aba bayobozi bombi bashimiye abaturage b’ako gace ku ruhare bagira mu kwicungira umutekano no guharanira iterambere ry’imibereho myiza n’ubukungu by’aho batuye.
Guverineri Gatabazi yavuze ko ubufatanye buzira amakemwa abo baturage b’Akarere ka Burera bafitanye n’Inzego z’umutekano n’iz’ibanze bwagize uruhare rukomeye mu kurinda ubusugire bw’ako gace hirindwa ibyaha birimo kwambuka umupaka mu buryo bunyiranyije n’amategeko, gukora ubucuruzi bwa magendu n’ubw’ibiyobyabwenge nk’agace gahana imbibi n’Igihugu cya Uganda.
Mu ijambo yagejeje ku baturage, Guverineri gatabazi yagize ati: “Inka muhawe uyu munsi ni ikimenyetso cy’urukundo, ubumwe n’amajyambere bishingiye ku bufatanye mwagaragaje mu guharanira umutekano ndetse n’iterambere ry’imibereho n’ubukungu muri aka gace kanyu.”
Abaturage bashimishijwe n’impano bahawe n’umukuru w’igihugu bashimangira ko batazatatira igihango cy’urukundo abagaragarije, ndetse batazahwema guharanira gukora ibibateza imbere banakaza ingamba mu kwicungira umutekano.
