Ishami ry’Umuryango w’Abibumbye ryita ku Buzima (OMS) ishami rya Afurika ritangaza ko abaturage basaga miliyoni zirindwi mu Burundi barwaye Malariya. Imibare mishya y’icyumweru cya 44 cy’uyu mwaka ni ukuvuga kuva kuwa 28/10 kugeza 03/11/2019) igaragaza ko Malariya yazamutse ikagera kuri 49% mu Burundi hagereranyijwe n’icyumweru cya 39 cyo 2018. OMS iravuga ko kuva mu kwezi kwa mbere uyu mwaka kugeza tariki 29 z’ukwezi kwa cyenda abantu miliyoni 7,233,138 barwaye malaria mu Burundi, iyi ndwara ikaba yarishe abagera ku 2,691. OMS ivuga ubu ko mu cyumweru cya tariki 23 – 29/09/2019 habaruwe abantu 121,704 basanzemo malaria na 32 yishe. Mu kwezi kwa munani, imibare yatanzwe na OMS y’abo basanzemo malaria yari abantu barenga miliyoni eshanu kandi yishemo 1,800, ubutegetsi bwo bwatangaje ko ari miliyoni 4,3 kandi yishe 1,400. Icyo gihe, mu kiganiro n’abanyamakuru Minisitiri w’ubuzima Dr ThaddĂ©e Ndikumana yavuze ko malaria mu Burundi atari icyorezo agereranyije na 2017 ubwo ubutegetsi bwemeje ko yabaye icyorezo. OMS yo yavugaga ko iyi mibare yo mu kwezi kwa munani uyu mwaka irenze ikigero cy’uko indwara yitwa icyorezo. Ubutegetsi bw’u Burundi ntacyo buratangaza ku mugaragaro ku mibare mishya ya OMS. Inkuru ya BBC
