Burundi: Madame Nkurunziza yajyanywe muri Kenya nyuma yo gusangwamo icyorezo cya Covid 19

Umugore wa Perezida Pierre Nkurunziza uzwi nka Denise Bucumi Nkurunziza ubu arabarizwa mu ivuriro rya Aga Khan Univesity Hospital riherereye i Nairobi muri Kenya aho ari kwitabwaho kuko yanduye Covid 19.

Ikinyamakuru citizentv kigaragaza ko Madame Nkurunziza yavuye i Bujumbura mu gitondo cyo kuri uyu wa kane tariki ya 28 Gicurasi akaba yaragiye mu ndege y’umuryango wita ku buzima muri Afurika AMREF.

Madame Nkurunziza ntiyajyanye n’umugabo we ahubwo yagiye aherekejwe n’abarinzi batatu aho umwe muri bo na we basanze yaranduye icyorezo cya Covid 19.

Kugeza ubu abantu ntibumva ukuntu Denise Nkurunziza yemerewe kwinjira muri Kenya kandi iki gihugu cyarashyizeho ingamba zo kutemerera abantu banduye kwinjira mu gihugu.

Pierre Nkurunziza yanenzwe n’amahanga ko ntacyo yakoze kijyanye n’ingamba zo guhagarika ikwirakwira ry’iki cyorezo gihangayikishije isi yose.
Mu ntangiriro z’uku kwezi uburundi bwirukanye abahagarariye umuryango mpuzamahanga wita ku buzima OMS/WHO n’izindi nzobere eshatu mu kurwanya coronavirusi.

Tariki ya 12 Gicurasi Minisitiri w’ububanyi n’amahanga ni we watangaje ko abo bantu bagomba kuva mu gihugu cy’ u Burundi. U Burundi ni cyo gihugu cyonyine muri Afurika cyanze guhagarika imikino y’umupira w’amaguru kandi ari kimwe mu bintu bihuza abantu benshi ari na byo bishobora gukwirakwiza icyorezo ku buryo bwihuse.

Muri iki gihugu kandi haherutse kuba amatora y’umukuru w’igihugu yasojwe umukandida w’ishyaka riri ku butegetsi rya CNDD-FDD, Evariste Ndayishimiye ari we wegukanye umwanya w’umukuru w’igihugu.

Agatho Rwasa utavuga rumwe n’ubutegetsi wari uhagarariye ishyaka rya CNL yamaze kugeza ikirego cye mu rukiko rushinzwe gukurikirana iyubahirizwa ry’itegekonshinga n’ibyavuye mu matora.