Minisiteri y’ubuzima mu Bwongereza, yatangaje ko guhera ku wa kane w’iki cyumweru izatangira kugeragereza ku bantu urukingo rwa COVID-19 rwakozwe na Kaminuza ya Oxford yo muri kiriya gihugu.
Byatangajwe na Matt Hancock, usanzwe ari umunyamabanga w’iriya Minisiteri. Kaminuza ya Oxford yakoze urwo rukingo, yavuze ko ruramutse rukoze izindi nka rwo zibarirwa muri za miliyoni zaba zatangiye kuboneka uhereye mu mpeshyi y’uyu mwaka, ku buryo byahita bigabanya ubwandu bwa kiriya cyorezo kimaze guhitana abarenga 175,000 ku isi. Ni icyorezo kandi cyamaze guhungabanya cyane ubukungu bw’ibihugu birenga 200 cyamaze kugeramo. Mu kiganiro n’abanyamakuru cyabaye ku wa 21 Mata, Hancock yavuze ko guverinoma y’Ubwongereza yakoze ibishoboka byose mu gushaka ruriya rukingo. Yavuze ko Minisiteri y’ubuzima yari imaze gutanga miliyoni 20 z’ama-Pound muri Oxford nk’inkunga yo kubafasha mu gukora igerageza rya ruriya rukingo, andi miliyoni 22.5 yo akaba yarahawe abashakashatsi bo mu kigo Imperial College London na cyo gikora ubushakashatsi ku miti. Abashakashatsi ba Oxford bayobowe na Prof. Sarah Gilbert, bemeza ko igikorwa cyo gutunganya ziriya nkingo kigomba kuba cyatangiye guhera muri Nzeri, nyuma y’amezi icyenda icyorezo cya Coronavirus cyadutse. Ni igikorwa cyizihuta cyane kuko mu busanzwe gukora urukingo bitwara byibura amezi 18 kugira ngo ruboneke. Hancock yavuze ko Leta y’Ubwongereza yiteguye gushora imari mu ikorwa rya ruriya rukingo, kugira ngo niruboneka ruzahabwe abaturage hakiri kare. Ubwongereza buri mu bihugu bikomeje korekwa cyane n’icyorezo cya COVID-19 ku isi, aho imibare igaragaza ko Abongereza barenga 129,000 bamaze kwandura kiriya cyorezo, mu gihe abo kimaze kwica barenga 17,300.
