Ikipe y’igihugu ya Misiri, Les Pharaohs, yageze ku mukino wa nyuma w’Igikombe cya Afurika isezereye Caméroun yacyakiriye kuri penaliti 3-1.
Ni nyuma y’uko iminota irenga 120 y’uyu mukino wa 1/2 cy’irangiza wabereye kuri Stade ya Olembe yari yarangiye amakipe yombi anganya 0-0.
Ni umukino abenshi bafata nk’uwa nyuma wakiniwe imburagihe kubera ubushongore n’ubukaka amakipe yombi afite mu Gikombe cya Afurika, dore ko nka Misiri igifite inshuro zirindwi ari yo yagitwaye kenshi, Caméroun ikayigwa mu ntege n’inshuro eshanu yagitwaye.
Mbere y’umukino hari hagaragaye amagambo ya Kapiteni Vincent Aboubakar wa Caméroun yibasira Mohamed Salah wa Liverpool, bikaba bimwe mu byawukomeje.
Yabwiye RFI ati: “[Salah] ntabwo ajya anyemeza. Ndabivuga ndanguruye kubera ko ndi umuntu uvugisha ukuri kandi nkaba mfite uburyo mbonamo ibintu.”
Salah wari mu bakinnyi bitezwe cyane muri uriya mukino ntiyanabonye amahirwe yo gutera penaliti zarangiye Misiri itsinze kuri 3-1, nyuma y’uko Caméroun ihushije penaliti eshatu.
Caméroun yahushije penaliti biciye kuri Clinton N’Jie wayitaye hejuru y’izamu, mu gihe izindi ebyiri umunyezamu Mohamed Abou Gabal ‘Gabaski’ yazikuyemo.
Misiri ya Salah izahurira ku mukino wa nyuma na Sénégal ya Sadio Mané bakinana muri Liverpool, ku Cyumweru.
Iyi Sénégal yawugezeho isezereye Burkina Faso ku bitego 3-1, mu mukino wabaye ku wa Gatatu.
