Ikipe ya Paris-Saint Germain yo mu Bufaransa, yasuzuguriye Manchester United ku kibuga cyayo cya Old Trafford iyihatsindira ibitego 3-1, mu mukino wa UEFA Champions league wo mu tsinda H.
Wari umukino wa gatanu w’itsinda ikipe ya Manchester United yahabwagamo amahirwe yo gutsinda, igahita yizera kuzazamuka ari iya mbere mu tsinda.
Neymar ni we wafunguriye PSG amazamu, ku gitego uyu munya-BrĂ©sil yatsinze ku munota wa gatandatu w’umukino. Ni ku mupira wari uzamukanwe na Kylian MbappĂ©, awuteye ugarurwa na Harry Maguire, gusa Neymar wari hafi aho awutereka mu rucundura.
Igitego cya PSG cyakurikiwe n’igitutu cy’abasore ba Manchester United bashakaga kwishyura, birangira babigezeho ku munota wa 32 babifashijwemo na Marcus Rashford.
Ni ku mupira uyu rutahizamu yaherejwe na Aaron-Wan Bisaka, awuteye atawuhagaritse ukoma ku kirenge cya myugariro Danillo uhita uruhukira mu izamu.
PSG yasabwaga gutsinda uriya mukino ku kabi n’akeza, yagarutse mu gice cya kabiri cy’umukino yariye karungu, yotsa Man United ishaka igitego cya kabiri.
Iyi kipe y’i Paris yatsinze igitego cya kabiri ku munota wa 69 ibifashijwemo na Kapiteni Marquinhos, ku mupira wari uturutse kuri koruneri ya Neymar awutera mu izamu n’umugongo.
Igitego cya kabiri cya PSG cyakurikiwe n’ikarita itukura yeretswe Fred wa Manchester United, ku ikosa yari akoreye kuri Marco Veratti.
Neymar wigaragaje cyane yatsindiye PSG agashinguracumu ku munota wa 91, ku mupira yazamukanye kuri Contre-Attaque awuhereza Mbappé na we wahise awuha Rafinha Alcantara, birangira uyu munya-Brésil awuhaye Neymar wahise awushyira mu izamu rirangaye.
Igitego cya gatatu cya PSG ahanini cyaturutse ku kuba Manchester United yose yari yazamutse ishaka igitego cyo kwishyura.
Gutsindwa uyu mukino byashyize Manchester United mu bibazo, kuko isabwa kujya gutsindira Leipzig banganya amanota 9 mu Budage cyangwa bakanganya kugira ngo yizere itike ya 1/8 cy’irangiza.
PSG iyoboye itsinda H n’amanota 9 yo igomba kwakira Instanbul Basaksehir yo muri Turkiya na yo igomba gutsinda kugira ngo irenge amatsinda.
Mu yindi mikino ikomeye yabaye harimo uwo mu tsinda E Chelsea yanyagiyemo Sevilla ibitego 4-0, byose byatsinzwe n’Umufaransa, Olivier Giroud.
FC Barcelona yo muri Espagne yo yagiye gutsindira Ferençvaros muri Hongria ibitego 3-0, bya Griezmann, Braithwaite na Ousmane Dembele.
Uko imikino yose yarangiye
-Istanbul Basaksehir 3-4 Leipzig
-Krasnodar 1-0 Rennes
-Manchester United 1-3 PSG
-Dortmund 1-1 Lazio
-Ferencvaros 0-3 FC Barcelona
-Juventus 3-0 Dynamo Kyiv
-Club Brugge 3-0 Zenit
-Sevilla 0-4 Chelsea
