Chelsea, Liverpool, Dortmund mu makipe akomeje guha icyubahiro George Floyd wishwe na Polisi

Abakinnyi n’amakipe yo mu shampiyona akomeye ku isi nk’iyo mu bwongereza (Primier League), iyo mu Butaliyani, muri Espagne n’izindi ntibashyigikiye iyicwa rya Floyd wishwe n’abapolisi muri Amerika.

Mu bwongereza abakinnyi b’amakipe nka Chelsea, Liverpool, Leicester na Newcastle bagaragaye bapfukamye mu rwego rwo guha icyubahiro George Floyd wishwe kuwa 25 Gicurasi 2020.

Kuwa mbere w’iki cyumweru ni bwo abakinnyi ba Liverpool harimo James Milner, Virgil Van Dijk na Andy Robertson batangiye gushyira amafoto y’abakinnyi bose bakinana kuri twitter bapfukamye hagati mu kibuga cya Anfield. Aya mafoto yaherekezwaga n’ubutumwa buvuga ngo “Ubumwe ni zo mbaraga ? Ubuzima bw’umwirabura ni ingenzi.”

Abakinnyi b’amakipe nka Chelsea, Leicester na Newcastle ni bo bakurikiyeho nyuma yuko Marcus Rashford na Jadon Sancho wo muri shampiyoni y’ u Budage na bo bavuze ko hakenewe ubutabera ku rupfu rwa George Floyd.

Kuri twiter ya Jamie Vardy yanditseho ati “ birahagije. Ubumuntu ni bwo bwa mbere! Twifatanyije namwe.” Aha Vardy yashakaga kuvuga ko ashyigikiye abigaragambya basaba ubutabera muri Amerika.

Lionel Messi, Captain w’ikipe ya FC Balcelona na we yifatanyije na Paul Pogba na Luka Modric bagaragaje ko urupfu rw’uyu mugabo rugaragaza ihohoterwa rigikorerwa abirabura. Aba bakinnyi bakaba baragiye banyuza ubutumwa bwabo ku mbuga nkoranyambaga.

Ishyirahamwe ry’umupira w’amaguru ku isi FIFA ryasabye andi mashyiramwe yo ku migabane no mu bihugu korohera abatanga ubu butumwa bwamagana irondaruhu.