Eritrea yatangaje ko yaciye umubano wa dipolomasi wose na Ethiopia, nyuma y’uko Addis Ababa ifashe icyemezo cyo gufunga Ambasade yayo i Asmara no kwirukana abadipolomate 10 bayo.
Minisiteri y’Ububanyi n’Amahanga ya Eritrea yatangaje ko yafashe iki cyemezo ku wa Kane tariki ya 1 Ukwakira 2026, ivuga ko nta bundi buryo yari ifite uretse “gusubiza” Ethiopia muri ubwo buryo no guhagarika umubano wa dipolomasi hagati y’ibihugu byombi.
Iki cyemezo cyafashwe nyuma y’uko Minisiteri y’Ububanyi n’Amahanga ya Ethiopia itangaje ko ifunze Ambasade yayo i Asmara, inatangaza ko abadipolomate 10 ba Eritrea barimo ushinzwe by’agateganyo Ambasade n’abandi bahagarariye Eritrea mu Muryango wa Afurika Yunze Ubumwe batemerewe kuba ku butaka bwa kiriya gihugu.
Abo badipolomate bahawe amasaha 48 yo kuva ku butaka bwa Ethiopia, nyuma y'uko Addis Ababa ivuze ko bagize uruhare mu bikorwa ibona nk’ibibangamiye umutekano w’igihugu, inashinja Eritrea kugira uruhare mu “bikorwa by’ubushyamirane n’ubushotoranyi” kuri yo.
Eritrea yamaganye ibyo birego, ivuga ko ibyo Ethiopia yakoze ari ibikorwa bidakwiye kandi ko nta yandi mahitamo yari ifite uretse gusubiza mu buryo bumwe, igaca umubano wose wa dipolomasi n’iki gihugu cy’abaturanyi.
Uyu mubano usenyutse mu gihe amakimbirane yongeye gukaza umurego mu Majyaruguru ya Ethiopia, cyane cyane muri Tigray, aho imirwano yongeye kubura hagati y’ingabo za Leta n’ihuriro ry’imitwe yitwaje intwaro riyobowe na Tigray People’s Liberation Front (TPLF).
Addis Ababa ishinja Eritrea, kimwe na Sudani na Misiri, gufasha iryo huriro rirwanya Guverinoma ya Ethiopia. Ibyo birego Eritrea irabihakana.
Mu 2018, Ethiopia na Eritrea ni bwo byari byabyukije umubano wabyo nyuma y’imyaka y’ubushyamirane bwakurikiye intambara yabaye hagati yabyo mu 1998–2000.
Ubu, guca umubano wa dipolomasi byombi bishyira ibihugu byombi mu bihe bishya by’ubushyamirane, mu gihe umutekano wo mu Ihembe rya Afurika usanzwe ufite ibibazo bikomeye.
Umuryango wa Afurika Yunze Ubumwe wasabye Ethiopia, Eritrea na Misiri kwifata no kwirinda ibikorwa cyangwa amagambo bishobora kurushaho gukaza umwuka mubi, usaba ko ibibazo hagati yabyo bikemurwa binyuze mu biganiro no mu nzira za dipolomasi.