Ikipe ya AS FAR yo muri Maroc ikinamo ba myugariro b’ikipe y’Igihugu ‘Amavubi’, Manzi Thierry na Imanishimwe Emmanuel ‘Mangwende’, yatsinzwe na Renaissance Sportive de Berkane bituma yuzuza umukino wa gatanu wikurikiranya idatsinda.
Iyi kipe y’Ingabo z’ubwami bwa Maroc yari yasuye Berkane mu mukino wa shampiyona, iyitsinda ibitego 2-1.
RS Berkane y’umutoza Florent Ibengé yafunguye amazamu ku munota wa 11 ibifashijwemo na Schadrack Lukombe kuri penaliti, mbere y’uko Youssef El Fahli ayitsindira igitego cya kabiri ku munota wa 79.
Impozamarira ku ruhande rwa FAR Rabat yinjiye ku munota wa 84 w’umukino biciye kuri Reda Slim.
Imanishimwe Emmanuel ‘Mangwende’ yari yabanje muri uyu mukino, mu gihe Manzi Thierry yinjiye mu kibuga ku munota wa 89 w’umukino asimbura.
Gutsindwa na RS Berkane byatumye AS FAR yuzuza umukino wa gatanu wikurikiranya idatsinda.
Iyi kipe y’umutoza Sven Vandenbroeck yageze ku mwanya wa munani n’amanota 25, irushwa 14 yose na Wydad Casablanca ya mbere.
RS Berkane yayitsinze yo yahise ifata umwanya wa gatatu n’amanota 28.
