Umuvugizi w’ingabo za FARDC muri kivu y’amajyepfo Capt. Dieudonne Kasereka atangaza ko izi ngabo zungutse amayeri y’uburyo bwo gutuma abarwanyi b’imitwe irwanya u Rwanda; FDLR na FLN bakamanika amaboko. Mu minsi mike ishize, ibinyamakuru byatangaje ko abarwanyi bo muri FLN na FDLR bagera ku 2,000 bamaze kwishyikiriza FARDC ndetse bamwe bamaze kugezwa mu Rwanda. Kugira ngo ibi bigerweho, FARDC yavuze uko iri kubigenza. Capt. Kasereka yabwiye Rwandatribune ko ” Uburyo n’ubuhanga FARDC iri gukoresha muri iki gikorwa ni ukugota bariya barwanyi kugira ngo batajya kure Ibi bituma barambika intwaro hasi maze bakishyira mu maboko y’Ingabo za Leta ya Congo. Ibi bikazakorwa kugeza ubwo nta n’umwe uzasigara mu mashyamba ya Congo.” Uyu musirikare avuga ko ubu ikigezweho ari ukwibanda ku kurandura umutwe wa FLN ukorana n’impuzamashyaka MRCD ukorera muri teritwari ya Kabare ho muri Kivu y’amajyepfo. Avuga ko nta kintu na kimwe kigomba guhagarika ibitero byo guhashya izi nyeshyamba za CNRD ndetse na FDLR ziherereye muduce twose two muri sheferi ya Nindja ho muri Territoire ya Kabare, no muri gurupema ya Nzibira muri Teritware ya Walungu. FARDC ikomeje guhashya inyeshyamba zirwanya u Rwanda mu gihe imyaka yari irenze 20 byarayinaniye. Haribazwa aho ikura izi mbaraga, bamwe bayishinja ko ikorana n’u Rwanda muri ibi bikorwa. Ibihugu byombi bihakana aya makuru.
