Ishyirahamwe ry’Umupira w’Amaguru mu Rwanda (FERWAFA) ryatangaje ko guhera mu mwaka w’imikino wa 2026/2027, abakinnyi bazajya bakorerwa ibizamini bitunguranye bigamije kumenya niba bakoresha ibiyobyabwenge cyangwa imiti itemewe yongera imbaraga (anti-doping).
Uyu mwanzuro wafatiwe mu nama ya Komite Nyobozi ya FERWAFA yabaye ku wa 1 Nyakanga 2026. Iri shyirahamwe rivuga ko iki cyemezo kigamije kurinda ubunyangamugayo bw’amarushanwa, guteza imbere ubuzima bw’abakinnyi no kurushaho kuzamura urwego rw’umupira w’amaguru mu Rwanda.
Muri iyo nama hanemejwe ko amakipe yose azajya yitabira amarushanwa ategurwa na FERWAFA azajya abanza kwiyandikisha. Nk’urugero, amakipe azakina shampiyona y’icyiciro cya mbere mu bagabo no mu bagore azajya yishyura amafaranga y’u Rwanda miliyoni ebyiri (2.000.000 Frw) yo kwiyandikisha.
Komite Nyobozi ya FERWAFA yanemeje gahunda yo kuvugurura isura y’iri shyirahamwe. Muri iyo gahunda harimo gukora ikirango gishya (logo), kuvugurura ibirango by’amarushanwa ategurwa na FERWAFA, gukora ibikombe bishya by’ayo marushanwa, ndetse no gutegura ibishushanyo bishya by’imyambaro y’amakipe y’igihugu mu byiciro byose.
FERWAFA yatangaje ko ibijyanye n’ibishushanyo by’ibirango n’imyambaro bizatoranywa binyuze mu irushanwa rizahuza abanyempano bafite ubuhanga mu gushushanya no gukora ibirango.
