Umugaba Mukuru w’Ingabo z’u Rwanda, Gen. Jean Bosco Kazura, kuva ku wa Kabiri ari i Warsaw mu gihugu cya Pologne, mu ruzinduko ari kugirira muri kiriya gihugu cyo ku mugabane w’u Burayi.
Igisirikare cy’u Rwanda kuri Twitter yacyo cyavuze ko Gen. Kazura yagiye muri Pologne ku butumire bwa mugenzi we uyobora Ingabo za kiriya gihugu, Gen. Rajmund Tomasz Andrzejczak.
Kuri uyu wa Kabiri ba Gen. Kazura na Rajmund cyo kimwe n’intumwa zo mu Rwanda na Pologne bahuriye mu biganiro ku cyicaro Gikuru cy’Ingabo za Pologne i Warsaw.
Ibi biganiro byerekeye inyungu za gisirikare z’ibihugu byombi byabaye nyuma y’uko Gen. Kazura yari amaze gushyira indabo mu rwibutso rushyinguwemo umusirikare utazwi.
Intumwa z’u Rwanda zitabiriye biriya biganiro harimo Brigadier General Patrick Karuretwa usanzwe Umuyobozi Mukuru ushinzwe imikoranire mpuzamahanga mu Ngabo z’u Rwanda, Ambasaderi w’u Rwanda muri Pologne, Prof. Shyaka Anastase n’abandi.
Uruzinduko rwa Gen Kazura muri Pologne ruje nyuma y’amasezerano agamije ubufatanye mu by’umutekano, by’umwihariko mu bijyanye n’inganda mu by’ubwirinzi kiriya gihugu cyasinyanye n’u Rwanda muri Kamena 2022.
Ni amasezerano icyo gihe yasinywe na Minisitiri w’Ingabo, Maj Gen Albert Murasira ku ruhande rw’u Rwanda, mu gihe Pologne yari ihagarariwe na Minisitiri w’Ububanyi n’Amahanga wungirije wari mu ruzinduko mu Rwanda, Pawel Jab?o?ski.
Ubufatanye bw’u Rwanda na Pologne muri iyi minsi buri gutera imbere kuko icyo guhe Jab?o?ski yanatangaje ko mu gihe cya vuba Pologne izafungura Ambasade mu Rwanda.
Muri Kamena 2021 nibwo u Rwanda rwashyizeho Ambasaderi warwo wa mbere muri Pologne nyuma y’imyaka myinshi yari ishize uhagarariye u Rwanda muri icyo gihugu afite icyicaro ahandi.
