Umugaba w’Ingabo za Uganda zirwanira ku butaka Lt Gen Muhoozi Kainerugaba, yatangaje ko Ingabo za Uganda zifatanyije n’iza Congo Kinshasa zimaze kwica ibyihebe bibarirwa mu gihumbi byo mu mu mutwe wa ADF.
Uyu mugabo usanzwe ari umuhungu wa Perezida Yoweri Kaguta Museveni yemeje aya makuru mu butumwa yanditse kuri Twitter ye.
Ati: “Njyewe Lt Gen Muhoozi Kainerugaba, Umugaba w’Ingabo za UPDF zirwanira ku butaka nshobora gusezeranya abaturage ba Uganda ko tumaze kwica ibyihebe 1,000 mu byatugabyeho igitero mu Ugushyingo.”
Ku itariki ya 30 Ugushyingo ni bwo Ingabo za Uganda zifatanyije n’iza Congo Kinshasa zatangiye kugaba ibitero ku birindiro by’umutwe wa ADF biri mu ntara za Kivu y’Amajyaruguru na Ituri, mu gikorwa cyiswe ‘Operation Shujaa’.
Ni ibitero Izi ngabo zagabye kuri uriya mutwe, nyuma y’iminsi mike ugabye igitero cy’iterabwoba i Kampala muri Uganda.
Ibitero by’Ingabo z’ibi bihugu byombi byashenye ibirindiro byinshi umutwe wa ADF wari ufite mu mashyamba ya Congo, birimo n’iby’ahazwi nka Kambi Ya Yua byafatwaga nk’Icyicaro Gikuru cy’uriya mutwe.
Ingabo za Uganda mu minsi yashize zavuze ko ubwo zarimo zigenzura agace ka Kambi ya Yua zabonye icyobo rusange gishyinguwemo abo bikekwa ko ari abarwanyi ba ADF babarirwa mu magana.
Gen Muhoozi yavuze ko “ADF yakoze ikosa rikomeye” ryo kugaba igitero ku nteko ishinga amategeko ya Uganda.
Yunzemo ati: “Ntituzareka kubica kugeza igihe Perezida wacu Yoweri Kaguta Museveni azatubwirira kubireka.”
Uyu musirikare yijeje abatuye intara za Kivu na Ituri ko ibikorwa by’Ingabo za UPDF na FARDC bigikomeje kandi ko bigomba gukanga ibyihebe.
