Ikipe ya Manchester United yategetse rutahizamu wayo Mason Greenwood ko agomba gukora imyitozo ku giti cye, nyuma yo kwica amabwiriza yo kwirinda icyorezo cya Covid-19 mu gihugu cya Iceland aho yari kumwe n’Ikipe y’Igihugu y’Ubwongereza.
Ku munsi w’ejo ku wa Kane ni bwo Greenwood w’imyaka 18 y’amavuko yagarutse muri Manchester United, nyuma yo kwirukanwa mu kipe y’Igihugu muri Weekend ishize.
Akigera ku kibuga cy’imyitozo cy’ikipe ya Manchester United i Carrington, Greenwood yahise abwirwa ko atagomba kwitozanya na bagenzi be mu minsi iri imbere, mu rwego rwo kwirinda ibyago bya Covid-19.
The Sun yavuze ko Greenwood yabwiwe ko agomba kujya agera ku kibuga cy’imyitozo cya Manchester United ari uko umutoza Ole Gunnar Soksjaer n’abakinnyi ba Manchester United bose batashye.
Mason Greenwood ntabwo azagaragara mu mukino wa gicuti Manchester United izakina na Aston Villa mu mpera z’iki cyumweru, mu rwego rwo kwitegura umukino w’umunsi wa mbere wa shampiyona izakinamo na Crystal Palace ku wa 19 z’uku kwezi.
Uwo mukino wa Crystal Palace Greenwood ashobora kuzawugaragaramo, ariko nyuma y’uko azaba yamaze gupimwa Covid-19 ibisubizo bikagaragaza ko atanduye kiriya cyorezo.
Greenwood na mugenzi we Phil Foden ukinira Manchester City, baheruka kwirukanwa mu kipe y’Igihugu y’Ubwongereza kubera kurenga ku mabwiriza yo kwirinda Covid-19 bagatumira abakobwa b’incuti zabo mu byumba bya Hoteli ikipe y’Igihugu y’Ubwongereza yari icumbitsemo yitegura umukino wa UEFA Nations league yagombaga guhuriramo na Denmark ku wa kabiri w’Iki cyumweru.
Ni nyuma y’uko bombi bari bakinnye umukino wa mbere mu kipe y’Igihugu ubwo Ubwongereza bwatsindaga Iceland igitego 1-0 ku wa gatandatu w’icyumweru gishize, gusa bakabura amahirwe yo gukina uwundi mukino ikipe y’Igihugu cyabo yanganyijemo na Denmark 0-0 ku wa kabiri w’Iki cyumweru.
