Kapiteni w’ikipe y’igihugu y’u Rwanda ‘Amavubi’, Haruna Niyonzima, yafashije ikipe ye ya Young Africans kwegukana amanota atatu y’umunsi wa kane wa shampiyona ya Tanzania, nyuma yo gutsinda Coastal Union ibitego 3-0.
Haruna Niyonzima winjiye mu kibuga mu ntangiriro z’igice cya kabiri cy’umukino asimbura, yatsindiye Young Africans igitego cya kabiri kinjiye ku munota wa 52 w’umukino.
Ni ku mupira yari ahinduriwe n’Umukongomani, Tuisila Kisinda uzwi nka ‘TK Master’, awutereka mu rucundura n’akaguru k’ibumoso.
Young Africans y’umutoza Zlatko Krmpotic yari yafunguye amazamu ku munota wa 48 w’umukino ibifashijwemo n’Umunya-BrĂ©sil, Carlinhos, itsindirwa agashinguracumu na Sogne Yacouba ku munota wa 64 w’umukino.
Umunya-Ghana, Michael Sarpong ntiyari mu bakinnyi 18 umutoza Krmpotic yifashishije kuri uriya mukino.
Gutsinda Coastal Union byatumye Young Africans igumana umwanya wa gatatu n’amanota 10, ikaba iyanganya na mukeba wayo Simba Sports Club ya kabiri ku rutonde rw’agateganyo rwa shampiyona.
Ikipe ya Azam FC ikinamo Ally Niyonzima ni yo ikomeje kuyobora shampiyona ya Tanzania n’amanota 12.
