Huye: Umugabo yishwe akuwemo ururimi

Abaturanyi b’uyu mugabo bavuga ko ejo kuwa Mbere yiriwe mu rugo akaza kuhava nimugoroba ariko bagategereza ko agaruka bagaheba.

Ndimurwango wishwe yari ari mu kigero cy’imyaka hagati ya 25 na 30, akaba yari afite umugore n’abana aho bari batuye mu mazu y’abasigajwe inyuma n’amateka aherereye mu Kagari ka Rango B.

Ababonye umurambo we bavuga ko bawusanze mu gishanga cya Rwamamba kiri munsi y’ishyamba rya pinusi riri mu Kagari ka Mpare, bakavuga ko abamwishe bashobora kuba bakoresheje ishoka kuko basatuye umutwe mo kabiri bagakuramo ururimi ndetse bakaba banasanze ishoka iruhande rw’umurambo we.

Umunyamabanga Nshingwabikorwa w’Umurenge wa Tumba, Vital Migabo avuga ko inkuru y’urupfu rw’uyu mugabo yamenyekanye mu gitondo cyo kuri uyu wa 23 Kamena 2020, aho inzego z’ubuyobozi n’abaganga bahise bajya ahasanzwe umurambo bagasanga koko ni byo.

Vital akomeza avuga ko uwishwe yari umuturage wari utuye mu mudugudu wa Byimana mu Murenge wa Tumba ariko akaba yaraturutse mu karere ka Nyaruguru.

Kugeza ubu ubuyobozi bw’Umurenge wa Tumba buri gushaka uko bwashyingura umurambo.

Umuvugizi w’Urwego rw’Ubugenzacyaha RIB, Marie Michelle Umuhoza yemeje ko amakuru y’urupfu rwa Ndimurwango ari yo ariko hatangiye iperereza kugira ngo harebwe icyaba cyamwishe.