Imirambo ikomeje kuboneka umusibirizo mu gace ka Burunga kari mu majyepfo y'u Burundi yateye inkeke mu baturage bibaza ikiri gutera izo mpfu zikurikiranya z'abaturage.
Imirambo ine imaze kuboneka muri ako gace kuva mu ntangiriro za Nzeri 2026 mu nk’uko imibare yakusanyijwe na SOS Médias Burundi ibigaragaza.
Umurambo uheruka kuboneka wabonetse ku wa Gatandatu, tariki ya 26 Nzeri 2026 munsi y’ikiraro cy’uruzi rwa Mutsindozi mu mudugudu wa Rutenderi, muri Zone Gatabo, intara ya Makamba. Byamenyekanye kuwa wa Gatatu ko uwishwe ko ari Jean-Claude Nshimirimana.
Uyu yari asanzwe ari umukozi w’Ikigo gishinzwe Amazi n’Isuku mu byaro (AHAMER), kandi yari yatangajwe ko yaburiwe irengero umunsi wabanje. Uku kuboneka gukurikiranye kw’iyi mirambo kongereye impungenge abaturage ku bijyanye n’umutekano w’ako karere ndetse n’impamvu imirambo iri kujugunywa ahantu hadatuwe cyane.
Jean-Claude Nshimirimana yari umuyobozi w’ishami rishinzwe gufasha amashyirahamwe y’abaturage, kandi yari na Perezida w’Inama y’Abakozi ya AHAMER.
Nk’uko amakuru abitangaza, yaburiwe irengero ku gicamunsi cyo ku wa Gatanu, tariki ya 25 Nzeri 2026 ubwo yari atashye avuye ku kazi ku biro bihagarariye AHAMER i Bujumbura, umurwa mukuru w’ubucuruzi w’u Burundi.
Amakuru y’uko yaburiwe irengero yatangajwe ku wa Gatatu, tariki ya 30 Nzeri ari na wo munsi umurambo we wamenyekaniyeho ku mugaragaro.
Nk’uko amakuru yakusanyijwe muri ako gace abivuga, hafi y’umutwe no ku munwa habonetse ibimenyetso by’amaraso. Hari kandi ibikomere byagaragaye, ariko icyabiteye ntikiramenyekana.
Umurambo wakuwe aho wari uri hifashishijwe abakorerabushake ba Croix-Rouge, mbere yo kujyanwa mu buruhukiro bw’ibitaro bya Rutana.
Amakuru yakusanyijwe ku baturage bo muri ako gace avuga ko bishoboka ko umurambo wajyanywe aho mbere yo kujugunywa munsi y’ikiraro.
Bivugwa ko imodoka yavuye mu muhanda wa Rutana-Gihofi ikerekeza ahari uruzi rwa Mutsindozi, bikekwa ko bishobora kuba byari mu rwego rwo guhisha ibimenyetso mbere yo kujugunya umurambo.
Ibi bisobanuro biracyategereje kugenzurwa n’abagenzacyaha. Uburyo umurambo wagejejwe munsi y’ikiraro n’abantu baba baragize uruhare muri ibyo bikorwa ntibiramenyekana.
Urupfu rwa Jean Claude Nshimirimana rwateje ibibazo mu bo bakoranaga. Bamwe mu bakozi bagenzi be bakeka ko kuba yaraburiwe irengero bishobora kuba bifitanye isano n’akazi yakoraga muri AHAMER.
Ariko kugeza ubu, nta makuru yigenga ahari agaragaza ko hari isano itaziguye hagati y’inshingano ze z’akazi n’urupfu rwe.
Uko yaburiwe irengero n’uko yapfuye, ndetse n’impamvu yaba yarabiteye, biracyategereje kumenyekana binyuze mu iperereza ry’inzego zibifitiye ububasha.
Uku kuboneka kw’umurambo kwongeye gutuma abaturage bahangayikishwa n’uruzi rwa Mutsindozi. Nk’uko abaturage baho babivuga, ngo ako gace kamaze gukoreshwa inshuro nyinshi mu kujugunyamo imirambo.
Kuva mu ntangiriro za Nzeri 2026, hamaze kuboneka k’umurambo wa Jean-Claude Nshimirimana byatumye umubare w’imirambo yabonetse mu Ntara ya Burunga ugera nibura kuri ine, nk’uko imibare ya SOS Médias Burundi ibigaragaza.
Ibi bibaye mu gihe ku rwego rw’igihugu hakomeje kugaragara impungenge z’imiryango iharanira uburenganzira bwa muntu ku bijyanye no kubangamira uburenganzira bwo kubaho, abantu baburirwa irengero ku gahato, ifatwa ridakurikije amategeko ndetse no kudahana ababigizemo uruhare.
Muri raporo zabo zitandukanye, iyo miryango ikunze gusaba ubuyobozi gukora iperereza ryimbitse ku rupfu ruteye amakenga no ku bantu baburirwa irengero, kugira ngo hamenyekane ababigizemo uruhare kandi imiryango y’abazize ibyo bikorwa ibone ukuri n’ubutabera.