‎Impamvu Gen. Ekenge atari akwiye gusubizwa mu kazi mu mboni za Nduhungirehe

Minisitiri w'Ububanyi n'Amahanga w'u Rwanda, Olivier Nduhungirehe, yamaganye igikorwa cya Guverinoma ya Repubulika ya Demokarasi ya Congo, cyo gusubiza ku mirimo ye, uwahoze ari Umuvugizi w'Igisirikare cya Congo (FARDC) Gen. Maj. Sylvain Ekenge, wari wahagaritswe kuri uyu mwanya kubera gukoresha imvugo zibiba urwango rushingiye ku moko zibasira cyane cyane Abatutsi.
‎
‎Avuga ku gusubizwa mu kazi kwe, Minisitiri Nduhungirehe abinyujije kuri X yanditse ko Itangazo ry’uko General Major Sylvain Ekenge yasubijwe mu kazi nk’Umuvugizi w’Ingabo za Repubulika ya Demokarasi ya Congo (FARDC) riteye ubwoba kandi ridakwiriye kubera impamvu zitandukanye yagaragaje:
‎
‎ 1) Riremeza, niba hakenewe ibindi bimenyetso, ko amagambo y’urwango ku Batutsi b’Abanyekongo n’ingengabitekerezo ya jenoside muri Congo atari ibikorwa by’abantu bake “babi” mu gisirikare cyangwa abagambanyi muri guverinoma, ahubwo ko ari gahunda ya politiki yishingiwe na Leta.
‎
‎ 2.) Ni amakuru yashyizwe ahagaragara, hafi mu ibanga, binyuze mu itangazo rya Sylvain Ekenge ryatangaje ibyabaye bibabaje, intego ikaba ari uguhagarika cyangwa gutera ubwoba abanenga bose bo mu gihugu cyangwa mu mahanga uku kugarurwa mu kazi.
‎
‎Minisitiri Nduhungirehe yibukije ko "ku itariki ya 27 Ukuboza 2025, ubwo yaganiraga na radio na televiziyo bya leta, RTNC, Sylvain Ekenge yaburiye Abanyekongo bagenzi be ababwira ko “iyo ushatse umugore w’Umututsi uyu munsi, ugomba kwitonda.” Yavuze ko abagore nk'abo bazana abagabo b'Abatutsi mu rugo rw'abashakanye, bakaberekana nka babyara babo cyangwa bishywa babo, kugira ngo bazabyarane abana babo bityo bagumane “ubwoko bwabo.”
‎
‎Nduhungirehe yakomeje agira ati: "Akoresheje iri jambo rutwitsi, Umuvugizi w'Ingabo za Congo yemeje itegeko rya mbere mu "Mategeko icumi y'Abahutu," ryasohowe mu Kuboza 1990 n'umujenosideri wo mu Rwanda Hassan Ngeze, wahamijwe icyaha n'Urukiko Mpuzamahanga Mpanabyaha rwashyiriweho u Rwanda (ICTR)."
‎
Nduhungirehe yongeyeho ko nyuma y'induru yavugijwe n'amahanga kubera iryo jambo, Gen. Major Sylvain Ekenge “yahagaritswe” ku mwanya we nk'Umuvugizi w'Ingabo za Congo, nyamara atigeze akurikiranwa n'amategeko.
‎
‎None ngo amezi icyenda nyuma y'igikorwa cye, cyo kubiba amacakubiri ashingiye ku bwoko, umusirikare mukuru wa FARDC aherutse gusubizwa mu mirimo ye, anyujijwe mu gikari.