Mu gihe Perezida Museveni wa Uganda yafashe ingamba zikomeye mu kurwanya icyorezo cya Coronavirus harimo no gufunga imipaka yose, umugambi we ukomeje gukomwa mu nkokora kuko hari impunzi ziri guturuka muri Sudani y’Epfo ziza muri iki gihugu hakaba hari impungenge ko zishobora gukwirakwiza Coronavirus.
Minisitiri muri Minisiteri ishinzwe Ibiza n’Impunzi muri Uganda, Musa Ecweru mu cyumweru gishize yari yatangaje ko Uganda ihagaritse kwakira impunzi ziturutse mu bindi bihugu muri iki gihe cya Coronavirus kuko yaba imwe mu mpamvu zituma iyi ndwara ikomeza gukwirakwira muri iki gihugu kimaze kubarura abarwayi 33 bayo.
Ishami rishinzwe kwakira impunzi muri iyi Minisiteri ryatangaje ko muri iki cyumweru ryakiriye nibura impunzi z’abanya-Sudani y’Epfo barenga 30 ku munsi,binjiye ku butaka bwa Uganda banyuze mu nzira z’ubusamo ziri impande y’umupaka wa Moyo uherereye mu karere ka Lamwo mu gihe imipaka yagutse ihuza ibihugu byombi ifunze.
Muri Sudan y’Epfo hakomeje kuvugwa ikibazo cy’inzara ikabije ikomeje kwibasira abaturage benshi muribo,bakaba barahisemo gusuhukira mu bindi bihugu ngo babone amaramuko no guhabwa ubufasha bw’imiryango nterankunga. Ibi kandi byiyongera ku mutekano utari mwiza muri iki gihugu ushingiye ku bibazo bya politiki byo guhangana hagati ya Perezida Salva Kiir n’uwari Visi perezida we Riek Marchar.
Titus Jojo uhagarariye ishami ryita ku mpunzi muri Minisiteri y’ibiza n’impunzi muri Uganda yatangaje ko bari kugerageza guha izi mpunzi bimwe mu by’ingenzi bakeneye nk’ibiribwa n’imyambaro ubundi bagasubizwa iwabo bitewe n’uko kuguma muri Uganda bitaborohera mu gihe iki gihugu kibasiwe na Covid-19 kandi izi mpunzi nyinshi ntizumva icyongereza n’izindi ndimi zikoreshwa n’abanya-Uganda bityo kuzigisha uko zishyira mu bikorwa ingamba zo gukumira iyi ndwara ntibyakoroha.
Uganda ikomeje kwirukana abaturage bo mu bihugu byo mu karere k’Afurika y’Uburasira zuba aho abantu 35 barimo Abanyarwanda 32 n’Abarundi batatu, baherutse kwirukanwa bashyirwa mu kato i Kagitumba mu Karere ka Nyagatare.
Kugeza ubu impunzi zisaga 100 nizo zimaze guhererwa ubufasha muri Uganda ku bufatanye n’inzego z’umutekano zikaba zarasubijwe mu bihugu byazo.
