‎Indege yari igiye muri Israel yayobejwe nyuma y'imirwano hagati y'abapilote

Indege yari ivuye i Dubai yerekeza i Tel Aviv yayobejwe ijya kugwa muri Arabia Saoudite mu buryo butunguranye nyuma y’imirwano hagati y’abapilote nk'uko abayobozi muri Israel babitangarije itangazamakuru ryaho.
‎
‎Iyi ndege ya Flydubai, yahagurutse ku Kibuga cy’Indege Mpuzamahanga cya Dubai muri Leta Zunze Ubumwe z’Abarabu mu gitondo cya kare cyo kuri uyu wa Gatatu, yagaragaje kode isaba ubutabazi nyuma y'amasaha abiri  itangiye urugendo nk'uko bitangazwa n'urubuga rukurikirana iby'ingendo z'indege Flightradar 24.
‎
‎Hashize iminota mike indege yahinduye kode ikoresha ikoreshwa mu gutangaza ko habaye ishimutwa ry’indege, ariko nyuma isubizaho isaba ubutabazi bwihutirwa nk'uko inkuru dukesha BBC ivuga.
‎
‎Ibiro bya Minisitiri w’Intebe wa Israel byavuze ko ibyabaye bidakekwa ko ari ugushimuta indege. Abagenzi babwiye ibitangazamakuru byaho ko bagize ubwoba bw'ubuzima bwabo ubwo indege yari itangiye kugwa butosho.
‎
‎Bivugwa ko kode y'ubutabazi yatanzwe nyuma y’amakimbirane hagati y’umupilote mukuru n’umwungirije, nk’uko byatangajwe n’abayobozi b’Ingabo za Israel. Indege FZ1073, yari itwaye abantu bagera ku 150, abenshi muri bo bakaba ari Abanya-Israel, yagombaga kugwa ku Kibuga cy’Indege cya Ben-Gurion ariko ijya kugwa ku Kibuga cy’Indege cya Tabuk mu majyaruguru y’uburasirazuba bwa Arabia Saoudite.
‎
‎Umuvugizi wa Flydubai yemeje ko indege "yahuye n'ikibazo mu gihe yari mu kirere", kandi ko amakuru mashya aza gutangazwa uko agenda aboneka.
‎
‎Yongeyeho ati: "Amatsinda yacu ari gukorana bya hafi n'inzego bireba."
‎
‎Amakuru ava kuri Flightradar24 agaragaza ko iyo ndege yamanutse butosho iri mu kirere cya Arabia Saoudite, nyuma y'amasaha abiri gusa ihagurutse; aho yamanutse intera y'ibirometero bisaga gato 5 mu gihe kitageze ku minota ibiri, nyuma gato ya saa 05:21 UTC (saa 06:21 BST).
‎
‎Saa 05:40, iyo ndege yinjiye mu kirere cya Jordan igihe gito mbere yo guhindura icyerekezo isubira muri Arabia Saoudite nyuma y'iminota mike, aho yahise itangira kumanuka igana ku butaka kugira ngo igwe.
‎
‎Ubwo Igisirikare cya Israel kirwanira mu kirere cyahise cyohereza indege z'indwanyi mu kirere nyuma y'icyo kibazo, kandi Minisitiri w'Intebe, Benjamin Netanyahu, ahita atumiza inama y'igitaraganya kuri icyo kibazo.
‎