Perezida Donald Trump wa Leta Zunze Ubumwe za Amerika, yatangaje ko ingabo zo mu mutwe udasanzwe z’igihugu cye zafashe mpiri Perezida Nicolas Maduro wa Venezuela n’umugore we.
Trump yemeje ayo makuru mu butumwa yanyujije ku mbuga nkoranyambaga ze.
Yavuze ko Maduro yafashwe nyuma y’ibitero ingabo za Amerika zagabye muri Venezuela mu masaha yatambutse.
Perezidansi ya Amerika yasubiyemo ubutumwa Trump yanditse ku rubuga rwe rwa Truth Social avuga ko “Leta Zunze Ubumwe za Amerika zagabye mu buryo bwagenze neza ibitero bikomeye kuri Venezuela n’umuyobozi wayo, Perezida Nicolas Maduro wafatanwe n’umugore we bakajyanwa hanze y’igihugu.”
Amerika yavuze ko amakuru arambuye kuri iriya operasiyo iyatanga mu masaha ari imbere.
Hagati aho, Umunyamabanga wa Leta Zunze Ubumwe za Amerika ushinzwe Ububanyi n’Amahanga, Marco Rubio, yatangaje ko Maduro azaburanishirizwa muri Amerika.
Kugeza ubu Venezuela ntizi aho Perezida wayo n’umugore we, Cilia Flores baherereye, nk’uko byatangajwe na Visi-Perezida wayo, Delcy Rodriguez.
Amakuru avuga ko ibitero bya Amerika byibasiye ibikorwaremezo bitandukanye muri Venezuela, birimo n’ibya gisirikare mu bice bitandukanye mu duce twiganjemo umurwa mukuru, Caracas.
