Intambara ya Jutland mu kaga Isi yahuye na ko ku itariki nk’iyi

Ku wa 31 Gicurasi mu mwaka wa 1916 habaye urugamba rukomeye kurusha izindi mu ntambara ya Mbere y’Isi ndetse ku itariki nk’iyi, abarenga 2,000 bahitanywe n’umwuzure wiswe Johnstown Flood.

Hari ku mugoroba ushyira saa 16h:00 wo kuwa 31 Gicurasi mu 1916 ubwo ingabo z’Abongereza zari ziyobowe na kabuhariwe David Beatty zahanganye n’imitwe y’ingabo z’Abadage, mu rugamba rwiswe Battle of Jutland.

Ubusanzwe Jutland ni umwigimbakirwa (Peninsula) uri mu burengerazuba bwa Denmark utandukanya inyanja ya y’amajyaruguru n’iya Baltic mu majyepfo y’Ubudage.

Mu rugamba rutoroshye imitwe y’ingabo z’Abongereza n’iz’Adabage zamishanyeho urufaya rw’amasasu karahava.

Uwari uyoboye umutwe w’ingabo z’Abadage witwaga German High Seas Fleet, Reinhard Scheer ni we wazanye igitekerezo cyo kugaba igitero ku ngabo z’Abongereza mu majyaruguru ya Scotland, ndetse ahita anohereza ubwato 19 bugendera munsi y’amazi (submarines) mu nyanja y’Amajyarugu busatira umugi wa Sunderland ari nako n’indege zari zicunze ko ingabo z’Abongereza zishingura ikirenge maze urugamba rukambikana.

Kuva ku isaha ya saa 02h:20 kugeza saa 03h:48 z’umugoroba, ubwo umwamikazi Mary yari yishwe, byatumye abasirikare barwanira mu mazi bagera ku 2000 bahasiga ubuzima.

Uru rugamba rwa Jutland rwari ruzwi no ku izina rya Skagerrak nk’uko Abadage barwitaga, rwari ruhuriwemo n’abasirikare 100,000 n’amato 150 y’intambara rukaba rwaramaze amasaha 72.

Muri rusange Abadage bahahombeye amato y’intambara 11 ndetse na 3,058 bose ku Badage barahakomerekeye bikabije. Ku ruhande rw’Abongereza ho biragaragara ko bitaboroheye na gato kuko urugamba rwarangiye abongereza 6,784 bakomeretse bikabije ndetse banahomba amato y’intambara 14 yose.

Mu gihe uyu munsi icyorezo cya Covid 19 kiri gutwara ubuzima bw’abatuye Isi kandi, ku itariki nk’iyi ya 31 Gisurasi mu mwaka wa 1889 ikiza cy’umwuzure wa Johnstown Flood cyahitanye abantu 2,200 bose.

Bitewe n’iyangirika ry’urugomero rw’amazi rwari ruherereye muri Pennsylvania muri Leta Zunze Ubumwe z’Amerika amazi yakwiriye mu duce twinshi atera umwuzure karahabutaka birangira abagera ku 2,200 bose bahasize ubuzima.

Uru ni urugomero rwari rwarubatswe mu 1840 mu mugezi wa Conemaugh rukaba ari rwo rwari runini ku Isi, ndetse uyu munsi ni rwo rwabyaye ikiyaga kinini ku isi mu byakozwe n’abantu.

Mu 1889 umujyi wa Johnstown wari utuwe n’abantu 30,000 biganjemo abakoraga mu nganda zikora ibyuma. Icyo gihe haguye imvura idasanzwe kuwa 31 Gicurasi ari na yo yanginje rwa rugomero. Byatangiye saa 03h:10 z’umugoroba aho amazi yavuye mu rugomero afite umuvuduko wa mile 40 ku isaha imwe gusa maze akubura buri kintu cyose yasanze mu nzira. Byatwaye imyaka itanu yose kugirango umugi wa Johnstown wongere wubakwe.