Polisi y’u Rwanda mu gitondo cyo kuri uyu wa Kane ushize, itariki ya 11 Ukuboza, yakiriye ku cyicaro gikuru ku Kacyiru, itsinda ry’intumwa 13 zaturutse muri Repubulika ya Zambia ziri mu ruzinduko rw’akazi mu Rwanda.
Iri tsinda riyobowe na Francis Mundanya, umuhuzabikorwa w’umushinga wo guteza imbere ubwikorezi bugamije kuzahura ubukungu bw’igihugu, zakiriwe mu izina ry’ubuyobozi bukuru bwa Polisi y’u Rwanda na Komiseri w’ishami rishinzwe ibikorwa n’ituze rusange; Commissioner of Police (CP) George Rumanzi.
CP Rumanzi yabahaye ikaze, abashimira kuba barahisemo kugirira uruzinduko mu Rwanda no muri Polisi y’u Rwanda by’umwihariko, abagaragariza na zimwe mu ngamba Polisi yafashe n’umusaruro zimaze gutanga mu guteza imbere umutekano wo mu muhanda.
Yagize ati: “Ingamba z’ingenzi zishingirwaho mu gucunga umutekano wo mu muhanda zubakiye ku nkingi eshatu ari zo; ubufatanye n’abaturage, ubukangurambaga no kwifashisha ikoranabuhanga.”
Yakomeje agira ati: “Abaturage bamaze gusobanukirwa uruhare rwabo mu kubumbatira umutekano wo mu muhanda binyuze mu bukangurambaga buhoraho, umusanzu wabo ni ingenzi mu kurwanya impanuka ziba n’ingaruka zazo ku buzima bw’abantu. Ikoranabuhanga ntabwo ari igisubizo mu kugenzura ko amabwiriza y’umuhanda yubahirizwa gusa, ryifashishwa no mu kuzamura urwego serivisi zitangwamo, kurwanya ruswa no kunoza uburyo bwo gutwara abantu neza.”
Ibindi biganiro birambuye bagiranye byagarutse ku ikoranabuhanga ryifashishwa na serivisi zitangwa n’amashami ya Polisi afite inshingano zifitanye isano n’umutekano wo mu muhanda, ibizamini n’impushya zo gutwara ibinyabiziga n’ubugenzuzi bw’ubuziranenge bw’ibinyabiziga.
Bwana Mundanya wari uyoboye iri tsinda, yashimiye Polisi y’u Rwanda ku ntambwe ishimishije imaze guterwa mu guteza imbere umutekano wo mu muhanda.
Yavuze ko ubunararibonye basangijwe muri uru ruzinduko n’ibyo biboneye n’amaso bijyanye n’iteranbere ry’umutekano wo mu muhanda na serivisi z’ubwikorezi ari ingirakamaro kandi ko bazazifashisha mu gufata ingamba zo guteza imbere umutekano wo mu muhanda mu gihugu cyabo.
Nyuma y’ibiganiro iri tsinda ryasuye ibiro bikurikiranira hafi imikorere ya camera zifashishwa mu kugenzura umuvuduko w’ibinyabiziga, Icyicaro cy’Ishami rishinzwe ibizamini n’Impushya zo gutwara ibinyabiziga (TL) mu Busanza mu Karere ka Kicukiro n’icy’Ishami rishinzwe gusuzuma ubuziranenge bw’Ibinyabiziga (AI) i Ndera mu Karere ka Gasabo.
