Ikipe ya FC Barcelona kuri uyu wa mbere, yemeje ko Quique Setién atakiri umutoza wayo mukuru, nyuma yo gusezererwa muri UEFA Champions league ku wa Gatanu w’icyumweru gishize inyagiwe na Bayern Münich yo mu Budage ibitego 8-2.
Ibyo bitego birimo bibiri bya Thomas Mürrer, bibiri bya Philippe Coutinho, icya Ivan Perisic, Serge Gnabry, Joshua Kimmich na Robert Lewandowski.
Ibitego bya FC Barcelona byatsinzwe na David Alaba na Luis Suarez.
Inkuru y’uko ikipe ya FC Barcelona yamaze gutandukana n’umutoza Quique Sétien, yazanwe bwa mbere n’umunyamakuru Fabrizio Romano wayitangaje FC Barcelona ikimara gutsindwa, mbere y’uko ikipe iyemeza kuri uyu mugoroba.
Romano yagize ati: “Barcelona yamaze gufata icyemezo cyo kwirukana Quique Setién, nyuma yo gutsindwa nabi cyane na Bayern Munich. Ntabwo azaba ari umutoza mu mwaka w’imikino utaha.”
FC Barcelona ibinyujije ku mbuga zayo zose yemeje ko yirukanye uriya mutoza igira iti: “Quique Setién ntakiri umutoza w’ikipe ya mbere. Umutoza mushya azatangazwa mu minsi iri imbere nk’igice cy’amavugurura akomeye [agomba gukorwa] mu rwego rwo kubaka ikipe bundi bushya.”
Amakuru avuga ko Ronald Koeman usanzwe ari umutoza w’Ikipe y’Igihugu y’Ubuholandi ari we ugomba gusimbura Setién wirukanwe.
Perezida wa FC Barcelona, Josep Maria Bartomeu waherukaga gutangaza ko muri iriya kipe hagomba kuba impinduka zikomeye, ibyanashimangiwe na myugariro wayo, Gerard Piqué wemeje ko ibyababayeho batsindwa na Bayern Münich bitari ugutsindwa gusa ko ahubwo ari ‘igisebo’.
Amakuru avuga ko nyuma yo kwirukana umutoza FC Barcelona inifuza kugurisha abakinnyi bayo 17, abo itazabonera amakipe yo kubagura ikazahitamo gusesa amasezerano yari ifitanye na bo.
Ibinyamakuru byo muri Espagne bivuga ko abakinnyi ntakorwaho muri iriya kipe ari umuzamu Marc-Andre Ter Stegen, myugariro w’Umufaransa, Clement Lenglet, Umuholandi Frenkie De Jong ukina mu kibuga hagati cyo kimwe na Lionel Messi.
Abandi badakorwaho ni abana bazamukiye mu ishuri ry’umupira w’amaguru rya FC Barcelona, barangajwe imbere na Ansu Fati cyo kimwe na Riqui Puig.
Quique Sétien yari umutoza wa FC Barcelona kuva muri Mutarama uyu mwaka, nyuma yo kuyigeramo asimbuye umutoza Ernesto Valverde wari umaze kwirukanwa.
Mu mezi hafi umunani umutoza Sétien yari amaze atoza FC Barcelona, nta gikomeye yayigejejeho kitari ukurangiza umwaka w’imikino nta gikombe na kimwe itwaye.
